Embaixada Amerika fasilita fo treinamentu baziku ba jornalistas Timor oan, hasa’e sira nia kapasidade no konesementu iha area jornalismu nian.
Treinamentu loron ida ne’e hetan partisipasaun masimu husi jornalistas Timor oan, tanba jornalista senior husi Voice Of America (VOA) mak fo treinamentu.
US Embassy Charge d’Affaires, Scott Ticnor, hateten liberdade imprensa ne’e importante tebes iha ambiente ne’ebe maka diak, bele haforsa prosesu dialogu, debate no halo koneksaun entre governu ho sosiedade.
“Hau hatene, katak servisu nudar jornalista ne’e todan, maibe iha poder tebes,” Ticnor hateten, iha Embaixada Amerika, Pantai Kelapa, Dili.
Ticnor afirma, wainhira sai jornalista ida, nia iha poder atu hili issu ne’ebe bele sai notisia no ho hanoin katak publiku tenke hatene inklui impaktu husi issu ne’e.
“Tanba ne’e hau espera treinamentu ne’e bele iha nia vantajen ba imi hotu nudar jornalista,” Ticnor esperansa.
Entretantu Treinadora (jornalista senior VOA), Inna Dubinsky, hateten jornalista Timor oan dadaun ne’e dedika an tebes, barani atu hala’o servisu ne’e no tenke aprende buat barak tan.
”Partikulamente iha etika jornalismu nian no principal liu ba atu sai hanesan jornalista ne’ebe investigative,” Treinadora Dubinsky hateten.
Tanba nasaun ne’e foun no foin maka dezemvolve no sei iha buat barak ne’ebe mak jornalista sira tenke aprende husi mondo tomak.
Iha fatin hanesan Diretor jornal seminal Bisnis Timor, Carlos de Jesus Malilaka, ne’ebe partisipa iha treinamentu ne’e, hateten kada aktividade treinamentu ba jornalistas ne’e importante.
“Jornalista iha Timor sei presiza duni kapasitasaun hodi aumenta sira nia konsementu iha area jornalismu nian,” nia hateten.
Iha mos jornalistas ne’ebe partisipa iha treinamentu ne’e mak hanesan jornalsita husi jornal Mata Dalan, Bisnis Timor, Radio Rakambia, Radio Timor Kmanek (RTK), Radio Loriku Lian inklui jornalista husi The Dili Weekly (TDW).
