Diretor Ezekutivu Fundasaun Mahein, Nelson Belo, konsidera servisu polisia intelijensia durante ne’e la’o ladun efetivu, tanba detekta sedu problema antes mosu konflitu.
Belo hateten, lei fo ona kompetensia ba sira (polisia no military) atu rekolha informasaun kona ba seguransa nian hanesan krimi komun ne’ebe bele fo ameasas ba estadu ou ba povu.
“Kazu sira hanesan kilat PNTL ne’ebe lakon no dadur halai husi prizaun ne’ebe sei helik husi autoridade nia matan, ne’e dezafiu ida ba servisu intelijensia,” Diretor FM ne’e hateten, iha Balide, Dili.
Nia dehan, durante ne’e polisia intelijensia sei susar atu detekta ka deskobre, tenke hadia sira nia sistema servisu.
Nia mos rekonese, katak polisia iha duni frakeza iha parte rekursu umanu no dezafiu seluk, maibe ne’e la’os razaun atu impede prosesu ne’e la la’o ba oin.
“Frakeza hirak ne’e mosu tanba menus kapasidade ba halo analiza intelejensia ba dadus sira nebe tama nune’e bele kanaliza hodi foti desizaun,” nia dehan.
Hatan ba kestaun ne’e Comandante do Comando da Operasional Nasional Superintendente Armando Monteiro, hateten kritika ne’ebe mai husi sosiadade sicil ne’e hanesan fanu, tane institusaun ne’e hodi nune’e servisu diak liu tan ba future.
“Institusaun ne’e foun, ita nia rekursu mos limitadu maibe sira tenta halo’o sira nia knar, hodi nune’e kolecta informasuan, kanaliza no relata informasoens hodi nune’e ita hola medida prevensaun,” Monteiro hateten.
Durante ne’e, nia dehan, servisu intelijensia kontinua lao no lao hela, iha progressu barak nebe mak dala ruma public lahatene, tanba kestaun servisus intelijensia ne’e dala barak segredu oituan.
