Komando Jeral Polisia Nasional Timor Leste (PNTL) sei sosa tan radio komunikasaun ba membrus polisia iha terenu iha tinan ida ne’e (2014).
Xefe Logistika PNTL, Superintendente Basilio de Jesus, hateten dadaun ne’e sira iha ona fundus propriu ne’ebe sentraliza iha Ministeriu Defeza no Seguransa (MDS).
“Tanba ne’e iha 2014 ami nia planu atu sosa tan radio komunikasaun balun,” Xefe Logistika PNTL ne’e hateten, iha Kaikoli, Dili.
Maibe antes ne’e, nia dehan, Komando Jeral PNTL sei halo proposta ba Ministeriu Defeza Seguransa. “So Ministeriu Seguransa mak bele koresponde ba ida ne’e,” nia dehan.
Iha fatin seluk Membru Komisaun B (seguransa , defeza no negosiu estranjeiru), Deputada Anna Ribeiro, konkorda ho planu ida ne’e maibe tenke iha kualidade.
“Tinan kotuk sosa no tinan ne’e sosa tan, ne’e diak, maibe radio hirak ne’e laiha kualidade,” nia hateten.
Tanba ne’e nia husu wainhira atu sosa radio komunikasaun, governu no PNTL tenke halo uluk verifikasaun ba radio komunikasaun ne’ebe maka diak liu.
