Diretor Klinika Bairo-Pite (KBP), Dr. Daniel Murphy, hateten atu prevene moras kankru susun ba inan sira, tenke fo susu esklusivu ba sira nia bebe, tanba bainhira sira la halo ida ne’e, risku bo’ot ba sira atu hetan moras ne’e.
Doutor Dan, hateten feto Timor barak mak hetan moras kankru susun, tanba sei menus konesementu inklui fasilidades ne’ebe seidauk kompletu hodi halo diagnostika ba moras ne’e.
“Importante mak inan tenke fo susu esklusivu ba bebe sira,” Doutor Dan hateten, bainhira partisipa iha primeiru kampania ba moras kankru susun, iha Bidau,Dili.
Nia informa, Klinika Bairo-Pite durante ne’e fo ona atendementu ba pasiente barak ho moras kankru hanesan kankru susun, ibun, ran (leukimia), aten no seluk tan.
Diretor Klinika KBP ne’e mos husu ba inan sira atu halo vasinasaun hepatitis B ba sira nia bebe bainhira moris mai, tanba kankru aten ne’e kauza husi moras ne’e.
“Hau husu inan sira hotu ; favor ida halo vasinasaun ba imi nia oan, no ba parteira sira bainhira bebe moris tenke ba halo vasinasaun hepatitis B,” nia sujere.
Entretantu membru Parlamentu Nasional, Deputada Ilda Maria da Conceicão, hateten edukasuan prevensaun importante tebes ba komunidades, nune’e bele iha konesementu no halo prevensaun antes.
Tanba realidade,nia hatutan pasiente barak mak ba iha fasilidade saude bainhira moras grave tiha ona hanesan kankru estadio tolu ba hat ona, entaun labele salva sira nia vida.
“Hau hanoin kampania diak ida, atu ema sente moras inisiu kedas tenke hahu halo tratamentu maibe dalabarak ne’e lahatene to’o grave tiha ona halai ba iha ospital medikus sira foti liman,” nia hateten.
Deputada husi bankada Fretilin ne’e husu atu halo mos promosaun ba aimoruk tradisional sira ne’ebe iha, tanba iha esperiensia balun hatudu, katak moras kankru bele kura ho aimoruk tradisional.
Iha parte seluk, Diretor Klinika Ospital Nasional, Aniceto Barreto, hateten hahu iha tinan 2010 to’o ohin loron registu ona 50% husi populasaun mak sofre moras kankru.
Nia hatutan, sira seidauk hatene kauza husi moras kankru ne’e rasik maibe tuir teoria bele genetic (keturunan).
Bazeia ba lista transferensia moras ba rai liur moras kankru ne’ebe durante ne’e medikus sira fo atendimentu mak kankru susun, matan, oan fatin, ran (leukimia) no seluk tan. Pasiente sofre kankru ne’e maioria husi distritu Viqueque, Lospalos, Balibo, Same inklui Dili.
“Hau sente moras kankru iha ita nia rai laran ne’e numeru ki’ik oan maibe intervensaun ne’e la fasil tanba moras ne’e tenke pasensia tratamentu lori tempu,”Diretor Barreto hateten.
