Polisia Komunitaria fo treinamentu ba pesoal seguransa voluntariu iha suku Poetete, distritu Ermera, hodi sira involve direitamente seguransa iha sira nia bairo laran.
Xefe Departamentu Polisia Komunitaria (POLKOM), Adjuntu Helena Das Dores Alves, hateten treinamentu hala’o tiha ona iha fulan Janeiru nia laran, ho objetivu atu sira mos bele fo kontribuiasuan ba seguransa iha suku laran.
“Kuandu problema ruma mosu iha komunidade nia le’et, seguransa voluntariu iha responsabilidade atu resolve iha sira nia area rasik,” Adjuntu Alves hateten, iha Kaikoli, Dili.
Adjuntu Alves hateten, ema sira ne’ebe tama iha seguransa voluntaria ne’e, hili direitamente husi komunidade iha suku laran.
“Sira hili ema ne’ebe sira rasik fiar, ne’e para bainhira mosu problema ruma sira ne’e ba koalia, ema fiar sira,” nia hateten.
Nia afirma, seguransa voluntaria ne’e involve joventude, veteranus, xefe aldeias, xefe sukus no programa ne’e rasik sei realize iha 13 distritu.
Iha parte seluk membru Komisaun B (seguransa, defeza no negosio estranjeirus), Deputada Anna Ribeiro, apresia ho inisiativa ida ne’e, tanba ho nune’e mak bele asegura seguransa iha sira nia bairo rasik.
“Mesmu seguransa ne’e Polisia nia knaar, maibe komunidade mos iha responsabilidade ba seguransa iha bairo laran,” nia katak.
Deputada ne’e espera katak programa hanesan sei implementa mos iha distritu seluk, nune’e seguransa iha sukus hotu bele la’o ho diak.
