Membru Parlamentu Nasional husu ba Ministerio Saude, atu ezekuta orsamentu fiscal ho disiplina nune’e bele fo benefisiu ba povu, tanba Orsamentu Jeral Estado (OJE) tinan 2014 sa’e kedas pursentu sia (9%) kompara ho tinan 2013 nian. 
Deputada Josefa Alvares Pereira Soares, hateten OJE tinan 2014 ba Ministerio Saude (MS) ho montante $67,204 miloens kompara ho tinan kotuk iha deit $61,217 miloens.
Deputada husi bankada Fretilin ne’e hateten, deputadu sira fo votus unanimidade ba orsamentu fiscal 2014 MS nian, tanba estado no governu iha komitmentu politiku ida atu hadia saude povu nian.
“Hau hein no espera, katak osan ida ne’e bele ezekuta didiak tuir duni nesesidades ne’ebe iha, labele hanesan tinan kotuk diresaun balun atu sosa ekipamentus medikus nian maibe uja hodi selu fali dividas,” Deputada Soares hateten, iha Parlamentu Nasional.
Tanba ne’e Deputada Soares husu dala ida tan ba MS tenke disiplina iha ezekusaun, tanba esperiensia iha tinan kotuk falta aimoruk iha fatin-fatin no halo komunidades kontinua halerik kona ba atendementu saude.
Entretantu Deputadu Aúrelio Freitas Ribeiro, hateten tinan kotuk problema mosu tanba orsamentu ki’ik, maibe tinan ne’e tenke asegura ona asistensia saude ba povu tomak.
“Agora ami tau esperansa ba ita bo’ot, ba oin labele iha tan problema aimoruk laiha, falta ambulansia, atendementu la diak no laiha esforsu atu halo prevensaun,” Deputadu Ribeiro hateten.
Iha parte seluk Ministru Saude, Sergio da Costa Lobo, apresia ho kritika no sujestaun sira husi parte hotu,e problem sira ne’e hotu tama ona iha planu asaun annual MS nian ne’ebe sei responde iha tinan ida ne’e.
Nia informa, tinan ida ne’e sei sosa tan transporte no hadia jestaun ambulansia, aimoruk, kompleta ekipamentus medikus inklui haforsa servisu sentru saude sira nian iha rai laran.
“Hau agradese tebes tanba kestaun sira ne’ebe hato’o ne’e problema ne’ebe hasoru lor-loron no sujestaun sira ne’e mos barak mak tama ona iha ami nia programa atu halo iha tinan 2014 ne’e,” Ministru Lobo hateten.
Nia dehan, problema ne’ebe MS hasoru durante ne’e mak jestaun no kapasidade jestor no medikus sira nian, tanba ne’e iha tinan kotuk ministerio konsege fo ona kursu kapasitasaun ba area jestaun no halo elaborasaun ba manual jestaun logistika jestor sira nian iha kraik.
