Ministeriu Justisa fo sosializasaun lei ho artigu 1 konstituisaun kona ba dever no direitu ba estudantes iha Universidade da Paz (UNPAZ).
Vise Ministru Justisa, Ivo Valente, hateten estudantes nudar sidadaun ne’ebe moris iha nasaun demokratiku, sira iha obrigasaun atu hatene sira nia direitu no dever ho lolos.
“Atu hatete ba ita bo’ot sira, katak direitu ne’e ikus, dever mak uluk,” Vise Ministru Valente hateten, iha Dili.
Tanba ne’e nia dehan, antes ejiji direitu, presiza halo uluk dever, tanba kestaun rua ne’e sei la husik malu.
“Ejiji direitu maibe dever la halo, ne’e la justu,” Vise Valente hateten.
Enkuantu Januario da silva, nudar dosente direitu, hateten sosializasaun ne’e importante duni atu nune’e bele aumenta konesementu estudante sira nian.
” Presiza sosializa, atu nune’e sidadaun hotu-hotu inklui estudantes hatene sira nia direitu no dever,” Dosente da Silva hateten.
Iha lidun seluk Deputadu Francisco da Costa, apresia ho inisiativa ne’ebe Ministeriu Justisa halo ona, hodi hasa’e konesementu estudante sira nian.
“Maibe labele sosializa deit ba estudantes, presiza mos ba komunidade iha 13 distritus,” Deputadu ne’e sujere.
Liu-liu ba komonidade iha area rural, nia dehan, barak mak seidauk hatene lei ne’ebe Parlamentu produs ona, governu presiza halo planu ne’ebe diak atu sosializa lei sira ne’e.
Entretantu estudante UNPAZ husi Fakuldade Direitu, Julia Soares, hateten sosializasaun ida ne’e importante no diak tanba sira hetan esplikasaun profunda kona ba asuntu rua ne’e.
