Xefe Departamentu Saude Ambiental no Vijilansia Sanitaria, Tomasia de Sousa, hateten moras dengue la’os kulpa Ministerio Saude (MS) nian deit, maibe ema hotu nia responsabilidade atu halo prevensaun. 
Nia hateten, ministeriu halo ona esforsu liu husi edukasaun promosaun saude ba komunidade sira, maibe atu prevene fila ba ema ida-idak nia an atu halo prevensaun ba sira nia familia no komunidade seluk.
“Tinan –tinan ami fo edukasaun no hanoin ba ema hotu atu prevene an ba moras sira ne’ebe relasiona ho udan monu rai inklui moras dengue,” Xefe Departementu saude Ambiental no Vijilansia, de Souza hateten, iha Kaikoli, Dili.
Nia dehan, capital Dili risku bo’ot ba moras dengue, tanba atividades barak liu hala’o iha sidade no komunidade sira soe foer arbiru deit halo susuk atu tolun diak.
Asaun prevensaun ne’ebe ministeriu halo mak hanesan vizita uma kain hodi halo abatisasi (tau aimoruk ba tanki uma kain nian hodi hamenus susuk nia tolun) no fo edukasaun ba komunidade sira, ikus liu mak fomigasaun hodi kombate susuk dengue.
Nia informa, iha tinan 2014 Ministeriu Saude liu husi ekipa sira halo ona vizita atu tau abatisasi hamutuk uma kain rihun 10 resin no fomigasaun ba bairo 700 resin.
Entretantu membru Komisaun F (edukasaun, saude, kultura, veteranus no igualidade jeneru), Deputadu Eladio Faculto, hateten kada tinan moras dengue no diarea sempre ataka komunidade sira liu –liu labarik sira,balun mate tanba governu lakonsege resolve problema lixu.
Tuir nia, moras dengue ne’e seriu, tanba ne’e governu tenke hanoin ona atu foti asaun prevensaun antes udan monu rai, liu –liu resolve problema lixu iha sidade laran.
“Sira nia atuasaun ladun iha momentu oportunu, dala ruma akontese tiha foin halo asaun, ne’e la los, prevensaun la’os rega fomigasaun deit,” Deputadu Faculto kritika.
Nia dehan, atu kada tinan povu sira labele hetan ataka husi moras sira ne’e, governu tenke hanoin ona atu kria politika ordenamentu sidade atu bele resolve problema lixu iha sidade, se la’e komunidade sira halo uma tuir sira nia hakarak no so’e fo’er arbiru.
