Diretora Ezekutivu Fundasaun Alola (FA), Alzira Reis, hateten esbosu lei trafiku humanu oras ne’e dadaun sei iha meja Ministeriu Justisa hodi halo analiza ba artigu sira ne’ebe iha lei ne’e.
Maske iha kodigu penal kriminaliza ona aktu trafiku humanu, maibe nia dehan, esbosu lei ne’e importante tebes atu bele fo kompetensia ba instituisaun kompotente sira atu fo asistensia ba vitima sira aleinde pena.
“Ami halo analiza ona ba esbosu ne’e no ami submete ona ami nia submisaun ba Ministeriu Justisa atu konsidera mos iha esbosu ne’e,” Diretora Fundasaun Alola, Reis hateten, iha Mascarenhas, Dili.
Nia hatutan, durante ne’e FA halo ona meius hotu hodi hasa’e komunidade sira nia konesementu kona ba trafiku humanu liu –liu meius ne’ebe autor sira uja hodi rekruta ema hodi sira bele halo prevensaun ba familias no komunidades.
Tuir estatistika ne’ebe Fundasaun Alola asesu ba to’o oras ne’e dadaun iha kazu hamutuk 50 mak relata ona husi rai laran ba rai liur no rai liur mai rai laran.
Husi numeru ne’ebe iha, nia hateten, kazu balun mak hetan ona desizaun final husi tribunal no suspeitur oras ne’e dadaun detein hela iha prizaun Becora.
Entretantu Deputada Josefa Alvares Pereira Soares, hateten maske Timor –Leste seidauk iha lei espesifiku ba trafiku humanu maibe iha lei kodigu penal kriminaliza aktu ida ne’e.
“Ita iha lei kodigu penal ne’e kriminaliza bainhira hetan ema ida ne’ebe halo ida n’ee konserteza nia tenke ba hatan iha tribunal no simu pena ne’ebe tribunal fo,” Deputada Soares hateten.
Nia hatutan, presentajen esplorasaun Timor oan ba rai liur ne’e sei ki’ik, maibe husi rai liur mai rai laran ne’e numeru as ona kada tinan.
Aleinde ne’e membru parlamentu ne’e mos prekupa ho esplorasaun labarik ne’ebe lao hela iha rai laran (domestiku) hanesan husi distritu mai iha sidade, tanba iha ho numeru ne’ebe as oituan maske seidauk kaer toman.
