Ministeriu Saude iha ona planu atu sosa tan ambulansia walu ho orsamentu jeral tinan 2014 nian, apoia servisu pesoal saude sira hodi evakua pasiente emergensia sira husi sentru saude ba ospital referral, nune’e bele hetan tratamentu intensive.
Ministru Saude (MS), Sergio da Costa Lobo, hateten durante ne’e iha sentru saude balun ambulansia laiha, tanba uluk nian balun at no paradu deit.
“Tinan ida ne’e ami sei sosa tan ambulansia hamutuk walu, atu fo apoia ba pasiente sira ne’ebe presiza evakuasaun emergensia,” Ministru Lobo hateten, iha Parlamentu Nasional.
Nia hateten, problema ambulansia liu-liu sistema manutensaun sai preokupasaun ministeriu nian durante ne’e, e agora prepara hela guia ida kona ba ujus ambulansia ne’ebe remata iha Marsu, kontinua kedas ho sosializasaun, depois implementa.
Kona ba distritu ne’ebe do’ok husi capital Dili, hanesan distritu Viqueque inklui sub-distritu Atauro, Lobo hateten, sei halo evakuasaun ho aviaun tanba ne’e mak agora dadaun MS hamutuk ho Ministeriu Obras Publiku atu hadia kampu aviasaun iha Viqueque no Atauro.
Nia dehan, iha tinan kotuk (2013) Ministerio Saude (MS) sosa kareta ambulansia hamutuk 15 ne’ebe oras dadaun prosesu hela to’o mai iha Timor –Leste inklui mos kareta multifunsaun hamutuk 12.
Entertantu Deputada Josefa Alvares Pereira Soares, husu ba Ministeriu Saude atu ezekuta osan ho didiak, tanba iha tinan 2012 Parlamentu Nasional tau osan ba kompras ambulansia, maibe ministru kansela no sosa fali motorizadas ba medikus.
“Hau hein katak tina ne’e tenke iha disiplina ezekusaun orsamentu, labele sosa fali motorizadas hanesan tinan kotuk,” Deputada husi bankada Fretilin ne’e hateten.
