Ministeriu Obras Publik aloka tan $5,000 ba Kompania Miguel Group hodi finalize estrada Malahara – Tutuala, distritu Lautem ne’ebe durante ne’e paradu.
Sekretariu Estadu Obras Publiku (SEOP), Luis Vaz Rodrigues, hateten osan inisiu halo projetu ne’e hamutuk $2,9 mill, ba 10 kilomentru no kompleta kedas ho aspal.
Maibe nia dehan, 10 kilometrus ne’e hanesan 1000 meter, entaun osan ne’e la to’o atu finalize, tanba ne’e agora aumenta tan $5,000 atu kompleta no iha Marsu 2014 tenke remata ona.
Kona ba estrada ne’e, nia afirma, ekipa husi obras publiku tun direitamente hare ona no estrada ne’e hanesan estrada nasional, e governu iha resposabilidade bo’ot ba kestaun ne’e.
“Ne’e estrada nasional no presiza duni atu halo diak no finalize ona,” SE Rodrigues hateten, iha Mandarin, Dili.
Iha parte seluk membru Komisaun E (infraestrutura, transporte, komunikasaun), Deputadu Inacio Moreira, hateten governu iha responsabilidade atu intervene, tanba obra ne’e halo desde tinan 2010 to’o agora seidauk remata.
“Karik kompania osan laiha, governu iha papel oinsa para bele rezolve kestaun ne’e, tanba estrada ne’e han tempu liu,” Deputadu husi bankada Fretilin ne’e hateten.
Moreira dehan,estrada Malahara liga ba Tutuala ne’e nesesidade duni atu hadia, tanba Tutuala sai hanesan fatin turismu.
Enkuantu komunidade Tutuala, Marcel Fernandes, hateten obra ne’e la’o, maibe to’o oras ne’e paradu hela, rai rahun barak no bele estraga saude.
