Ikan tuna hanesan mos parte ida husi riku soin Timor nian iha tasi laran ne’ebe Ministeriu Agrikultura e Pescas (MAP) halo ona exportasaun ba nasaun tolu durante ne’e.
Ministru Agrikultura e Pescas, Mariano Asanami Sabino, hateten nasaun tolu ne’ebe sai konsumidores ba ikan tuna Timor nian durante ne’e mak Singapura, Korea no Japaun.
“Ikan tuna ne’ebe exporta hamutuk 120 toneladas pur ano,” Ministru Asanami Sabino hateten, iha nia knar fatin, Comoro, Dili.
Asanami Sabino, rekonese katak prosesu exportasaun durante ne’e seidauk la’o ho diak, maibe ba future presiza hadia diak liu tan.
“Ba future ita hakarak halo prosesamentu iha ne’e no peskas integradu entre portu ho aero porto,” Asanami hateten.
Nia dehan, durante ne’e sistema hotu-hotu seidauk konsentra iha fatin ida deit, presiza halo planu oinsa mak Timor –Leste bele iha ofisina rasik atu hadia roo bainhira at.
“Ne’e mak ita bolu dehan sidade de peskas,” Ministru Asanami dehan.
Iha fatin seluk Deputadu Estanislao da Silva, hateten exportasaun ikan tuna ne’e halo kedas iha tempu governu anterior, maibe faila no governu ida ne’e kontinua exporta fali ba nasaun sira ne’e.
“Ne’e pasu pozitivu, buat ida diak, maibe tenke halo didiak atu nune’e labele paradu fali,” Deputadu husi bankada Fretilin ne’e hateten.
Entretantu estudante Univesidade Nasional Timor Lorosa’e (UNTL), Vasco Fernandes, husu ba governu atu halo transparansia wainhira halo exportasaun riku soin ruma.
“Nune’e povu bele hatene riku soin timor nian saida deit maka exporta ona ba rai liur,” nia dehan.
