Husi Orsamentu Jeral do Estado (OJE) 2014, governu aloka $590,000 ba Comisaun Nasional de Combate HIV/SIDA Timor –Leste (CNCS-TL) ne’ebe governu estabelese hodi hala’o atividade edukasaun prevensaun ba transmisaun virus HIV/SIDA ba komunidades.
Vise Primeiru Ministru (VPM), Fernando Lasama de Araújo, hateten problema HIV/SIDA ne’e problema nasional ne’ebe estado foun ida ne’e hasoru tanba ne’e tinan ida ne’e governu fo atensaun seriu atu kombate liu husi kampania hasa’e konesementu komunidade nian atu prevene an husi virus ida ne’e.
“Ita iha osan ne’ebe aprova ona iha hau nia gabinete liu husi transferensia publikas, atu aloka ba iha komisaun nasional kombate HIVll/SIDA hamutuk $590 mil atu hala’o nia servisu,” Vise PM, Lasama hateten, iha Parlamentu Nasional.
Entretantu Sekretario Ezekutivu CNCS-TL, Daniel Marçal, hateten dadaun ne’e sekretariado prepara ona planu orsamentu ne’ebe sei hare hamutuk ho membru konselho komisaun sira kona ba fasilidade no rekursu ne’ebe presiza hodi supporta servisu komisaun nian.
“Ami nia planu ba programa mak edukasaun prevensaun no atu hare kondisaun ba maluk sira ne’ebe afetadu HIV/SIDA,” Marçal hateten.
Nia hateten, iha fulan Marsu komisaun ne’e hahu hala’o kampanha kona ba prevensaun ba moras HIV/SIDA ba komunidade sira iha teritorio tomak, atu sira iha konesementu no buka solusaun hamutuk.
Tuir dadus Ministerio Saude hahu tinan 2003-2013 liu husi VCCT ne’ebe estabelese iha fasilidade saude konsege detekta ona ema nain 355 mak afetadu virus HIV.
Husi numeru ne’e, nia dehan, iha ema nain 39 mak mate no nain 129 oras ne’e dadaun hala’o hela tratamentu Anti Retro Viral (ARV) iha fasilidade saude no nain 195 mak sei follow up.
Iha parte seluk, Diretor Fundasaun Timor Harii (FTH), Aguia Belo, husu atu hare didiak planu orsamentu ba atividades sira ne’ebe sei hala’o, labele dupla.
“Budget ne’e bo’ot demais, ita presiza hare area ne’ebe ita halo, se la’e atividade sira bele la’o dupla,” Diretor Belo hateten.
