Grupu Feto Parlamentar Timor –Leste (GMPTL) deskobre katak lideransa komunitaria balun liu –liu iha area remotas ladun komprende ho diak kona ba Lei Kontra Violensia Domestika (VD).
Prezidente GMPTL, Deputada Josefa Alvares Pereira Soares, sente preokupa ho situasaun ida ne’e, tanba bainhira halao dialogu ho komunidade sira iha baze, maioria mak laiha konesementu kona ba lei ne’e. “Pior liu xefe suku sira mos la komprende,” Deputada Soares, iha Parlamentu Nasional.
Tanba ne’e, tuir nia, susar atu kombate violensia domestika iha rai laran bainhira lideransa komunitaria rasik laiha konesementu ne’ebe klean kona ba legislasaun sira ne’ebe vigora iha rai laran.
“Sira ladun komprende no intende didiak lei kontra violensia domestika ho divorsiu, sei iha konfuzaun bo’ot ba konseitu rua ne’e,” Deputada husi bankada Fretilin ne’e hateten.
Nia dehan, Sekretaria Estadu ba Promosaun Igualidade (SEPI) iha obrigasaun bo’ot ida atu tun ba baze (area remotas) halo sosializasaun to’o iha ne’eba, labele buka deit sidade.
Nia hatutan, sosializasaun lei ne’e importante tebes ba komunidade sira no ba lideransa sira, atu nune’e sira bele halo intervensaun ruma tuir forma ne’ebe klaru bainhira akontese violensia domestika.
Entretantu Sekretaria Estado Idelta Maria Rodrigues, rekonese katak sosializasaun lei kontra violensia domestiak seidauk masimu, maibe nafatin esforsu hodi sosializa lei ne’e ba iha komunidade hotu.
Nia hateten, bainhira lei ne’e promulga SEPI halo kedas sosializasaun ba iha 442 xefe sukus sira hotu iha 13 distritus maibe to’o ohin nafatin la komprende ida ne’e mak situasaun real ne’ebe akontese importante mak tenke honestu atu bele resolve.
“Hau kontente tanba sira bele hateten sai la komprende signifika ita honestu situasaun mak hanesan ne’e ita buka meus atu hadia hau hanoin ida ne’e diak atu ita fo atensaun,” SE Rodrigues.
