Iha tinan ida ne’e (2014) governu liu husi Ministeriu Negosiu Estranjeiru no Kooperasaun sei loke tan embaixada iha nasaun hat, mak hanesan Cambodia,Myanmar,Brunei inklui La’os.
Vise Ministru Negosiu Estranjeiru no Kooperasaun (MNEK), Constancio Pinto, hateten nasaun hat mak hanesan nasaun ikus iha pais ASEAN nia, Timor-Leste loke embaixada iha tinan ne’e.
“Ita loke embaixada iha nasaun hat ne’e, tanba iha ita nia kampania adezaun ba ASEAN nian,” Vise Ministru Pinto hateten, iha Parlamentu Nasional.
Nia dehan, orsamentu atu loke embaixada hat iha nasaun hat ne’e tama ona iha Parlamentu Nasional hodi diskuti no aprova.
“Ita hein katak bainhira aprova ita loke ona ita nia embaixada iha nasaun hirak ne’e,”nia hateten.
Nia informa, total orsamentu $32 miloens ne’ebe mak haruka mai iha Parlamentu Nasional bazeia ba kustu de vida iha rai ida-idak ninian.
“Ita laiha orsamentu espesifiku ba embaixada sira antes ita loke embaixada.Ami sei halo levantamentu ida kona ba kustu de vida iha rai ida-idak nian,tanba iha rai balun kustu de vida as,” nia hateten.
Entretantu Deputadu Cesar Valente de Jesus, hateten loke embaixada iha nasaun hat ne’e importante tanba bele loke dalan investimentu.
Nia hateten, loke embaixada ne’e diak tanba bele fasilita ema halo investimentu bo’ot liutan.
“Ita hare katak mundu ohin loron ne’e koalia kresimentu ekonomia, tanba ne’e ita la hatur ita nia embaixada iha nasaun sira ne’e, oinsa ita bele hetan informasaun detalhu husi nasaun seluk,” nia hateten.
Iha sorin seluk Primeiru Ministru (PM), Kayrala Xanana Gusmao, hateten orsamentu atu loke embaixada iha nasaun hat ne’e preve ona iha Orsamentu Jeral Estadu (OJE) 2014 nian.
Tuir nia, liu husi reprezentante foun Timor-Leste nian iha estranjeiru ne’e bele reforsa kapasidade influensia no reputasaun pais nian ba kuadru adezaun ASEAN ninian.
“Liu husi sira ita sei konsege reforsa kapasidade influensia no reputasaun pais nian ,liu-liu iha kuadru adezaun ba ASEAN,” PM Gusmao hateten.
