Membru Parlamentu Nasional lamentavel, tanba estrada diresaun Dili-Baucau ne’ebe halo tiha rehabilitasaun maibe agora at, tanba alkatraun ne’ebe uja ba estrada ne’e laiha kualidade.
Membru Komisaun E parlamentar (infraestruturas, transportes no komunikasaun), Deputadu Manuel de Castro Pereira, hateten ida ne’e akontese tanba falta kontrolu husi Ministeriu Obras Publiku (MOP).
“Ita hare husi Kairavela mai to’o Manatuto komesa kuak bo’ot-bo’ot fali ona,” Deputadu Castro lamenta, iha Parlamentu Nasional.
Deputadu husi bankada Fretilin ne’e mos lamenta, tanba durante ne’e Ajensia Dezenvolvementu Nasional (ADN) ba sobu deit projetu sira ne’ebe mak ki’ik, maibe projetu bo’ot sira la sobu.
“Hau husu, se bele KAK ho Sekretariu Estadu asuntu Parlamentar hato’o ba Konselho Ministru atu hare to’ok buat ne’e,” Deputadu Castro sujere.
Entretantu Deputadu Virgilio da Costa Hornai, iha nia intervensaun, hateten katak alkatraun sira ne’ebe sertifika hodi makina ba hanehan deit ne’e la merese ba Timor, tanba laiha kualidade.
“Ita tesik dalan ba Baucau sira ne’e estrada sira ne’ebe mak hadia’a fo kontratu orsamentu pur volta $9 miloens maibe at fila fali ona,” nia preokupa.
Tuir nia, lolos alktraun ne’ebe uluk Indonezia nia tempu uja ne’e mak kontinua uja, maibe uja fali alkatraun seluk.
“Ita fasilita fali kompania sira ne’ebe halo nia industria fo nia produtu sira ne’e ba ita,” Deputadu Hornai preokupa.
Hatan ba preokupasaun ne’e Sekretariu Estadu Obras Publika (SEOP), Luis Vas Rodrigues, katak rehabilitasaun estrada ne’ebe Kompania Estrada Bo’ot halo ne’e, kontratu mai husi governu anterior nia tempu.
“Kompania Estarada Bo’ot kaer ne’e atu taka kuak ki’ik-ki’ik sira ne’e, la’os atu halo to’o 50 meter, ne’e la’e,” SE dehan.
Nia hateten, aspal ne’ebe mak oras ne’e dadauk Kompania Estrada Bo’ot uja hodi taka kuak ne’e uja aspal malirin.
Tuir karakteristika rai Timor ne’e uja aspal manas mak foin bele kaer rai, maibe uja aspal malirin la kaer rai, tanba nia kompozisaun kimika rai nia karbonu ne’e as.
