Ministra Solidaridade Sosial (MSS), Isabel Amaral Guterres, ameasas sei hapara ajudus ba familia vitima dezastre naturais sira ne’ebe fa’an fali material konstrusaun ne’ebe governu fob a sira.
Ministra Guterres hateten, governu apoia material sira ne’e atu hakma’an vitima sira nia susar no terus hodi hadia hikas sira nia hela fatin, la’os fa’an fali.
“Sekarik bee tama fali, familia sira ne’e labele simu tan ona ajudus, tanba realmente sira la uja ba sira nia an maibe fa’an fali,” Ministra Guterres dehan, iha Parlamentu Nasional.
Iha tempu badak, nia dehan, ekipa teknika MSS nian sei halo monitorizasaun ba material sira ne’ebe entrega ona ba iha benefisiariu sira, hodi hare direitamente uma ne’ebe benefisiariu sira halo no buka tuir karik balun fa’an ho razaun ruma.
“Ami nia ekipa sei tun halo fiskalizasaun atu hare modelu uma ne’ebe benefisiario sira halo,” nia dehan.
Iha parte seluk, komunidade sub-distritu Uato-Carbau, distritu Viqueque, Marito Amaral, rekonese katak iha duni benefisiariu balun mak fa’an fali material konstrusaun ne’ebe sira simu ba funsionario publiku balun ho presu normal.
“Iha kazu ida, komu nia hela do’ok, entaun haruka oan mane mak ba simu material sira ne’e iha administrasaun no material balun fa’an kedas ba funsionario sira hanesan semen ho presu $8 kada saku,” nia dehan.
Nia hateten, problema ne’e mosu tanba ekipa husi MSS la fo informasaun ne’ebe klean katak material sira ne’e labele fa’an, katak se mak fa’an sei hetan sansaun nune’e benefisiario sira mos tauk hodi labele fa’an.
