Kazu asidente trafiku ne’ebe akontese durante tinan 2013 hamutuk 1.530, husi numeru ne’e ema nain 73 mak mate, kanek todan hamutuk nain 328 no kanek kma’an iha nain 1.228.
Komandante Operasional Nasional, Superintendente Xefe Armando Monteiro, hateten asidente trafiku hirak ne’e akontese, barak liu tanba motorist sira la kontrola an bainhira lori motor ka kareta no balun tanba hemu lanu no matan dukur.
“Balun mos tanba estrada at,” Komandante Monteiro hateten, iha Kaikoli, Dili.
Kompara ho kazu asidente iha tinan 2013 ho 2012, nia dehan, iha tinan 2012 as liu, tanba rezulta ema nain 76 mak mate, kanek todan 4.485 no kanek kma’an hamutuk nain 139.Dadus hirak ne’e kobre iha distritus hotu.
Iha fatin seluk Deputada Josefa Alvares Soares, hateten kazu asidente trafiku iha Timor ne’e sei kategori numeru ne’ebe ki’ik, kompara ho nasaun seluk.
“Atu redus, entaun ema ne’ebe lori motor no kareta tenke ho volume ne’ebe normal, lampu transito tenke ativa diak no estrada diak,” Deputada Soares hateten.
Entretantu Motorista Manuel Fernandes, hateten asidente trafiku akontese tanba barak mak seidauk iha konsiensia no komprende malu bainhira halai iha estradas.
“Dala ruma lampu merah mos halai liu deit, balu ho kondisaun lanu mos lori motor no kareta,” nia dehan.
