Membru organizasaun Asian Federation Involuntary Disappearances (AFAD) ne’ebe kompostu husi nasaun Nepal, Thailandia, Filipina, Indonesia, Korea Sudeste, El Salvador inklui Timor –Leste husu ba estadu Timor –Leste atu ratifika konvensaun internasional kona ba ema lakon forsadu ho imediata. 
Prezidente AFAD, Mugiyanto, hateten ratifikasaun konvensaun ne’e pasu ne’ebe positive no importante tebes ba estadu Timor –Leste atu halo buat ruma hodi bele prevene aktu violasaun direitus humanus ne’ebe akontese iha tempu pasadu.
Nia hatutan, bainhira Timor –Leste ratika no asina ona konvensaun ne’e sei fo mos benefisiu bo’ot ida ba estadu Timor –Leste hanesan membrus, tanba nudar membru konserteza iha nasaun barak mak apoia intermus teknika no financial hodi buka tuir Timor oan sira ne’ebe lakon iha tinan 1975-1999.
“Se Timor-Leste ratifika, Timor-Leste mos bele hetan apoiu teknikal hanesan finanseiru, expert no medical hodi identifika ema sira ne’e hanesan teste DNA atu identifika, mas ne’e presiza kustu ne’ebe bo’ot,” Prezidente AFAD, Mugiyanto hateten, iha Dili.
Alem de hetan apoiu teknikal husi membru nasaun sira seluk ho ratifikasaun ne’e, nia dehan, bele mos asegura implementasaun rekomendasaun sira husi CAVR no CVA.
Entretantu, ativista Direitus Humanus Jose Luis Guiterres deskontente ho estadu TL no Indonezia, tanba rekomendasaun ne’ebe mai husi CAVR no CVA iha tinan lima liu ba to’o ohin loron seidauk iha indikasaun progresu ruma hodi buka tuir ema sira ne’ebe lakon iha tinan 1975-1999.
“Tinan lima ona ema hira mak ita hetan ona komisaun ne’ebe sira atu harii ne’e iha ne’ebe,” ativista ne’e dehan.
Nia hatutan parte legislasaun Timor –Leste iha abansadu hanesan iha artigu 9 Konstituisaun RDTL obriga atu adopta prinsipio direitus humanus emediatamente maibe nia implementasaun frazil tebes.
Iha parte seluk, Membru Parlamentu Nasional, deputadu Arão Noe De Jesus Amaral hateten katak governu iha obrigasaun atu hare tratadus sira ne’e atu submete ba iha parlamentu nasional hodi ratifika tanba tratadus sira ne’e importante tebes atu prevene aktu violasaun direitus humanus ne’ebe akontese labele akontese fila fali iha futuru.
“Hau hanoin tratadus sira kona ba ema lakon ne’e importante tebes lolos fo prioridade ba kestaun sira ne’e maibe agora governu liu husi ministerio negosio estarangeirus atu hare tratadus sira ne’e hodi submente mai iha Parlamentu sei fo prioridade kedas hodi ratifika tanba ne’e importante tebes,” nia dehan.
