Antena eis Radio Portuguesa iha Markoni oras ne’e dadaun fruzu no dodok dadaun ona, Tuir Deputada Maria Fernanda Lay, katak ida ne’e fo ameasas bo’ot ba komunidades ne’ebe hela besik iha area ne’eba.
“Desde segunda lejislatura, asuntu ne’e hau foti ona iha parlamentu ida ne’e, husu para governu sobu tiha, maibe to’o agora seidauk,” Deputada Lay preokupa, iha Parlamentu Nasional.
Nia preokupa, tanba iha tinan kotuk antena ida monu iha Ministeriu Negosio Estranjeiru nia sorin no estraga komunidade nia uma tolu kedas.
“Iha Domingo horiseik monu tan ida iha Fatuhada, hanesan tan uma ida vizinu ho senhor Ministru Agio Pereira, sorte la rezulta ema mate iha asidente ne’e,” nia preokupa.
Tanba ne’e nia husu ba Sekretariu Estadu ba Komunikasaun Sosial atu haruka Bombeirus sira ba koa tiha besi antenna ne’e.
Deputada ne’e mos husu ba komisaun kompetente atu sobu tan antenna rua ne’ebe mak sei iha Markoni, tanba komunidade sira hela iha area refere nakonu.
Iha sorin seluk komunidade Markoni, Joao Pereira, hateten antenna ne’e tempu anin bo’ot fo ameasa bo’ot ba komunidade sira ne’e, tanba besi sira ne’e balun dodok ona.
“Ami husu ba governu se bele karik antenna sira ne’e bele sobu tiha, atu nune’e labele monu ba ema nia uma sira,”Pereira sujere.
Hatan ba preokupasaun ne’e Sekretariu Estadu Komunikasaun Sosial (SEKOMS), Nelio Isaac Sarmento, katak nia sei haruka nia staf sira ba hare antenna ne’e.
“Hau seidauk identifika antenna ne’e se nian, keta antenna ne’e kompanha telekomunikasaun sira nian ka, se nian?, ami sei buka tuir lai,” SE Sarmento katak.
