Sekertariu Estadu Arte no Kulutra loke konkursu festival arte no kultura ba grupu distritu 13, ho objetivu atu prezerva Timor nia kultura inklui mos promove area turismu iha rai laran.
Konkursu festival kultura ne’e konvida hotu grupu tradisiona husi distritu hotu, maibe distritu 12 deit mak partisipa, distritu Lautem la konsege partisipa tanba koordenador grupu tradisional distritu ne’e mate.
Konkursu festival ne’ebe mak distritu 12 ne’e aprezenta, mak dansa tradisional, pintura, muzika koremetan no konkursu dahur.
“Tinan-tinan ita mai aprezenta ita nia dansa, tanba ema barak mos koalia ho ami katak ita la halo ita nia kultura bele lakon,” Sekretaria Estadu Arte no Kultura (SEAK), Maria Isabel de Jesus Ximenes hateten, bainhira abertura konkorsu ne’e iha Sentru Konvensaun, Dili.
Nia dehan, kultura tradisional Timor-Leste nian sei la lakon, tanba ne’e tinan tinan tenke promove nafatin.
“Tanba ida ne’e mak ami bolu distritu hotu ida-idak mai aprezenta sira nia dansa kulturais,dansa tradisionais,dahur ho muzika koremetan nian,” nia dehan.
Tanba ne’e SEAK apela ba grupu tradisional sira, katak kultura hanesan objetivu turistiku ne’ebe tenke kaer metin nafatin.
Entretantu Prezidente Komisaun Organizadora, Cecilia Assis hateten festival ida ne’e hanesan programa annual ministeriu nian.
“Konkursu ne’e ami halo durante loron tolu nia laran iha dansa tradional,muzika tradisional (koremetan) no tebe dahur,”Asis esplika.
Enkuantu team juri ba eventu ne’e ema nain lima, kompostu Jeca Smith avalia ba muzika koremetan, Eugenio Sarmento ba dansa tradisionais, Lita Monteiro ba dansa moderna ninian, Mito Soares ba muzika modernu ninian no Rui de Carvalho tau matan ba dezainer ninian.
Total orsamentu ba konkorsu ne’e hamutuk hala’o ba $72,000. Orsamentu ne’e atu fasilita viajen partisipantes ba mai, alojamentu,hahan,perdiem inklui selu ekipa de juri sira.
“Premiu ba konkursu ne’e ami sei fo osan no fahe sertifikadu deit.osan ami hare’e pur grupu,grupu ida sei hetan 300 dolar to’o 400 dolar kada materia,” nia hateten.
Iha fatin hanesan Bendito da Costa Amaral, grupu muzika no dansa tradisional husi distritu Ermera, hateten eventu ne’e importante tebes hodi promove kultura Timor nian ho diak liu tan.
“Ami nia preparasaun ba arte no kultura ne’e ami treinu durante semana ida nia laran to’o ami mai partisipa iha ne’e,” nia hateten.
Durante iha treinamentu nia laran difikuldade ne’ebe mak sira hasoru mak tali viola ninian no mos bee moos laiha.
“Ami nia nain ulun sira ladun tau matan mai ami, tanba sira hateten mai ami katak programa ida ne’e responsabilidade nasional ninian la’os responsavel distritu nian ,” nia dehan.
Nia hateten, sira nia grupu tuir atividade hanesan ne’e bebeik ona, primeiru iha salaun GMT,iha Palacio do Governu no agora dadaun ne’e.
Maske la hetan primeiru lugar iha tinan kotuk, maibe hetan segundu lugar.
“Lakon ka manan hau la preokupa, maibe tinan oin ami sei partisipa nafatin atu promove ita nia kultura,”nia hato’o.
Konkursu Festival ne’e durante loron tolu nia laran hahu husi loron 13 no sei remata iha 15 Fulan Novembru 2013.
