Estudante husi Universidade da Paz preokupa maka’as kona ba pena ne’ebe Tribunal Distrital Dili fob a arguidu/a sira durante ne’e, tanba nunka aplika pena trabalhador afavor komunidade (TAK), maske lei fo ona dalan.
Joao Freitas, estudante Fakuldade Direitu husi Universidade da Paz (UNPAZ), hateten iha pena oin hat mak hatuur iha lei, mak pena prizaun, pena multa, pena suspensaun no pena trabalhador afavor da komunidade.
“Durante ne’e aplika deit mak pena prizaun, multa, suspensaun, maibe nunka aplika pena trabalhador, ne’e tanba saida,” Estudante Freitas kestiona, iha Hotel Timor, Dili.
Hatan ba preokupasaun ne’e, Juis Prezidente Administrador Tribunal Distritu Dili (TDD), Duarte Tilman hateten durante ne’e sira la aplika pena TAK ba arguidu/a sira, tanba governu la kria kondisaun.
“Ita tenke husu ba kondenada/u hakarak atu hala’o pena trabalhador afavor da komunidade ga la’e, no segundu seidauk iha meus ne’ebe mak sufsiente, se karik ita haruka sira ba trabalhu, ba trabalhu iha ne’ebe, atu haruka deit nia ba hamos beleta kuak iha tribunal nia oin?,” Juis Tilman dehan.
Tanba ne’e nia husu ba estadu atu bele prepara kondisaun ba asuntu ne’e, fatin ne’ebe diak, no tenke iha kontrolasaun.
Iha parte seluk Vise Ministru Justisa, Ivo Valente, hateten agora dadaun governu prepara hela kondisoens, maibe ne’e kordenasaun linha interministerial.
“Tenke iha Ministeriu solidaridade Sosial, tenke iha Sekretariu Estadu Seguransa, tenke iha tribunal sira, oinsa atu aplika buat ne’e,” Vise Ministru Justisa ne’e dehan.
Nia dehan, presiza klaru katak see maka sei halo kontrolasaun ba kondenada/u ne’e wainhira nia halo hela trabalho afavor da komunidade.
“Katak semana-semana nia ba halo limpeza ne’e ga la’e, no se’e maka halo relatoriu ba iha tribunal, mais iha lei determina ona buat sira ne’e, agora presiza sosializa atu nune’e idak-idak hatene halo nia servisu no iha future tribunal bele aplika,” Vise Valente hateten.
