Dadaun ne’e Sentru Lideransa Feto ba Dame (WPL) iha Universidade Nasional Timor Lorosa’e prepara hela estudantes feto atu sai lideransa ne’ebe produtivu iha future.
Diretor Instituto ba Dame, Konflitu no Estudi Sosial (Sentru Dame) UNTL, Antero Benedito da Silva, hateten programa ne’e mosu tanba durante ne’e feto foinsa’e sira barak liu sai vitima iha sosiedade nia le’et.
“Hau espera katak tinan 10 mai, feto foinsa’e sira ne’ebe iha Women Peace Leadership ne’e sai lider ne’ebe diak ba nasaun ida ne’e, la presiza sai lider bo’ot bele sai xefe suku, administrador, xefe departamentu sira, nune’e bele servi povu iha sosiedade laran,” Diretor da Silva dehan, iha Kampus FASPOL Kaikoli, Dili.
Sentru ne’ebe harii iha 2012 ne’e, alem de fo treinamentu no kapasitasaun ba feto sira kona ba oinsa sai lider ne’ebe diak, kursu ba lian Ingles, Portugues no administrasaun nian, mos halo dialogu entre feto universitariu ho background oi-oin ho feto sira husi universidade seluk kona ba problema feto nian inklui halo peskiza.
Agora dadaun, nia dehan, feto universitariu nain 30 mak akompanha hela Portugueza nain rua fo hela treinamentu kona ba direitus humanus no balun akompanha hela Japoneza nain rua halo peskiza.
Tuir relatorio estudu ne’ebe hala’o husi organizasaun Search For Common Ground (SFCG), hatudu katak partisipasaun foinsa’e feto sei minimu 27% kompara ho mane 37% husi 22% foinsa’e ne’ebe hola parte iha programa kapasitasaun ne’ebe organiza husi sosiedade sivil no governu kona ba rezolusaun konflitu hodi kontribui ba harii paz kompara ho mane tanba feto foinsa’e sira barak mak sei sulan deit susar atu oituan atu hakat ba liur hodi tuir aktividade sivika ruma.
Entretantu, Diretor Ezekutivu SFCG, Jose Vicente de Sousa, hateten SFCG-TL iha hanoin ida hare ba inkluzaun feto iha atividade harii paz no obstaklu sira ne’ebe kontinua hapara feto atu sai lideransa feto.
“Sei esforsu maka’as liu tan husi kriasaun programa ne’ebe mak sei atrai numeru feto klosan barak liu tan partisipa iha atividade sira ne’e,”Diretor SFCG ne’e dehan.
Nia dehan, SFCG sei servisu hamutuk ho eskolas, igreja, lideransa local no partidus politikus sira hodi atu hasa’e partisipasaun foinsa’e sira liu –liu feto sira nia involvementu iha atividade harii paz iha nivel local.
