Deputadu Estanislao da Silva ejiji ba deputadu/a sira ne’ebe halo vizita trabalhu ba rai liur, depois de fila mai tenke fo fila osan restu ne’ebe mak Parlamentu Nasional fo.
Nia hato’o kestaun ida ne’e tanba deputadu balun hafoin ba vizita trabalhu ba estranjeirus, osan restu sira la fo fila.
“Hau fo fila, tanba ami deputadu Dusae (Eduardo Barreto) ami ba Brazil hau lori $5,000 la hotu, restu $3,000 hau fo fila ba sekretaria parlamentu nian,” Deputadu husi bankada Fretilin ne’e dehan, iha Parlamentu Nasional.
Maibe nia dehan, dalaruma husi sekretaria lakohi simu fali osan restu ne’e, tanba ho razaun deputadu hotu-hotu bainhira halo vizita ba estranjeirus, fila mai la fo fila.
Tanba ne’e, nia husu ba deputadu/a hotu-hotu ba iha rai liur fila mai tenke halo justifikasaun ba osan viajen ninian.
“Hau hakarak husu osan ne’e ba gasta saida deit,gasta ba almosu ga,gasta ba jantar ga gasta ba pasiar,” nia preokupa.
Entretantu Prezidente Komisaun A (konstitusionais, justisa, administrasaun publika, poder local no anti korupsaun), Deputada Carmelita Moniz, hateten fundu rezerva ne’ebe mak komisaun sira lori ba vizita iha estranjeiru nia gastu ba iha transportes, enkontru ho delegasaun sira seluk,han inklui aluga fatin.
Maibe nia dehan, osan restu tenke fo fila ba finansa parlamentu nian.
“Ami Komisaun A ba vizita Indonezia kuaze semana tolu nia laran, ami lori fundu rezerva $30,000 ami hatama fali $10,000 ba kofre do estadu,” Deputada Moniz dehan.
Nia dehan, vizita Komisaun A nian sempre iha justifikasaun, tanba lori kompletu ho invoice hotu.
Iha sorin seluk Deputada husi bankada Fretilin, Maria Angelica Rangel dos Reis, hateten nia prontu atu fo fila fali osan perdiem, karik iha baze legal ruma.
“Iha momentu ne’eba ami ba halo estudu komparativu, maibe hau la konsege to’o hotu tanba hau nia aman mate, hau tenke fila fali mai.Hau pronto fo fila osan restu sekarik iha baze legal ruma,” Deputada dos Reis hotu.
“Hau ho hau nia kamarada Estanislao da Silva iha momentu ne’eba ami halo viajen kamarada Estanislao mos fila no hau mos fila,” nia dehan.
Hatan ba preokupasaun ne’e Sekretariu Jeral Parlamentu Nasional, Mateus Belo, hateten orsamentu fundu rezerva atu gasta ba saida deit klaru ona, so osan perdiem mak uja bah an individual nian.
“Lamentavel, hau atu koalia ida ne’e,se ita bo’ot sira mak la fo fila depois saida fali hau la hatene,”Belo dehan.
Nia dehan, to’o oras ne’e osan restu fundu rezerva ninian seidauk iha deputadu ida mak fo fila, tanba ne’e nia husu ba deputadu/a sira hotu tenke konsiensia moral, hodi fo fila osan restu fundu rezerva nian.
