Organizasaun Search For Common Ground hamutuk ho Universidade Nasional Timor Lorosa’e, Fakuldade Siensia Politika (UNTL-FASPOL) lansa relatoriu estudi baze de dadus kona ba joventude, demokrasia no harii dame iha Timor-Leste.
Diretor Search For Common Ground (SFCG), Jose Vicente de Sousa, hateten rezultadu estudu ne’e importante tebes ba sira nudar sasukat ida atu garantia implementasaun programa koresponde duni ba nesesidade komunidade liu –liu joventude.
Organizasaun SFCG rasik, nia dehan, iha programa rua ; mak hanesan asaun demokratiku ba dezenvolvementu liu husi media no kapasitasaun (DAME) no partisipasaun joventude hodi promove estabilidade (YEPS) ne’ebe finansia husi EUA no Europeia.
Tanba ne’e atu implementa, SFCG servisu hamutuk ho Universidade Nasional Timor –Lorosa’e (UNTL) hala’o peskiza ida hodi identifika nesesidade foinsa’e sira nian no sira nia partisipasaun harii dame.
“Ita laiha baze dadus ida forte, entaun la hatan ba nesesidade komunidades nian liu –liu foinsa’e sira, tanba ne’e ami halo estudu ida ne’e ho hanoin ida, katak bele hamosu indikadores sira ba SFCG atu responde ba nesesidade komunidade nian,” Diretor SFCG, Jose Vicente de Sousa dehan, iha salaun Enkontru FASPOL-UNTL, Kaikoli, Dili.
Nia hatutan, peskiza durante fulan tolu ne’e hala’o iha distritu neen, hanesan distritu Aileu, Manatuto, Baucau, Dili, Ermera no Liquisa.
Peskiza ne’e foku liu ba partisipasaun jovetude iha prosesu demokratiku no dezenvolvementu, kolaborasaun entre governu no sosiedade sivil, kna’ar media nian atu fo informasuan ba komunidade hodi kontribui ba prosesu hari dame no demokrasia iha rai laran.
Iha relatorio ne’e hatudu, katak 22% foinsa’e involve ona iha atividade sira ne’ebe kontribui ba rezolusaun pasifiku ba konflitu, hanesan treinamentu, mediasaun hodi resolve problema, sesaun dialogu, grupu foinsa’e no seluk tan.
Entretantu Diretor Instituto ba Dame, Konflitu no Estudi Sosial (Sentru Dame) UNTL, Antero Benedito da Silva, hateten sira nia parte apoia peskizador (estudantes) deit.
Maske relatorio ne’e hanesan projetu ida, maibe nia dehan, nudar dosente sira sei hare didiak relatoriu ne’e hodi integra iha prosesu hanorin nian no sai materia diskusaun ho estudantes sira.
“Ami halo peskiza la’os deit atu ba hanorin, maibe kontribui ba sosiedade atu bele influensia politika iha estadu hanesan relatoriu ida ne’e influensia politika iha estadu,e ami hein katak bele la’o,” nia dehan.
Iha parte seluk, Administrador Distritu Aileu, Martinho Matos ne’ebe partisipa iha lansamentu relatoriu ne’e, fo agradese ba SFCG no UNTL ne’ebe halo ona peskiza ida ne’e bele ajuda lideransa local sira hodi fo atensaun ba problema foinsa’e sira iha distritus.
“Hau husu organizasaun atu fo kopia relatoriu ne’e ida mai hau atu lori ba distritu Aileu, nune’e hau bele integra iha hau nia planu asaun annual distrital hodi prepara foinsa’e sira partisipa iha municipio,” nia dehan.
