Organizasaun Lalenok Ba Ema Hotu, konsidera planu Sekretariu Estadu Desentralizasaun Administrativa atu halo rekrutamentu ba jestor iha distritus ladauk iha baze legal, tanba Dekretu Lei Pre-deskonsentrasaun Prezidenti da Republika seidauk promulga.
Diretor Lalenok Ba Ema Hotu (LABEH), Julio Gil da Silva Guterres, hato’o kestaun ida ne’e tanba governu hasai ona kriteira ida atu halo rekrutamentu ba jestor distrital nain 10.
“Bazeia ba saida mak sira halo rekrutamentu,” Diretor LABEH, Guterres preokupa, iha Kampung Baru, Dili.
Tuir n ia, atu halo rekrutamentu ba funsionariu publiku, ne’e kompetensia Komisaun Funsaun Publiku nian, la’os Sekretariu Estadu Desentralizasaun Admistrativa (SEDA) mak rekruta.
Iha sorin seluk Diretor Asia Foundation, Hugo Fernandes, sujere ba governu atu tetu didiak, antes halo rekrutamentu.
“Hau rona iha sub-distritu Dom Aleixo sira komesa halo ona nomeasaun kona ba se mak atu jestor ba Dili, ita tenke fo ezemplu diak oinsa para harii estadu de direitu demokratiku e’ebe diak,” Fernandes dehan.
Nia mos preokupa kona ba Dekretui Lei Pre-deskonsentrasaun ne’e, tanba laiha enkuadramentu legal.
Entretantu Deputadu membru Komisaun A, Antoninho Bianco, hateten maske governu halo ona divulgasaun ba iha distritu sira, maibe dekretu Lei Pre-deskonsetrasaun prezidenti da republika seidauk promulga.
“Ita hare’e katak governu nia pensamentu hanesan faze ida ke sira atu hala’o antes tama ba prosesu pre-deskonsentrasaun,” Deputadu Bianco katak.
Bianco dehan, iha konseitu pre-deskonsentrasaun ne’e mak hamosu sei troka admistrador sira ba fali jestor.
“Kuandu administrador sira ne’e atu hatun ga hase ne’e kompetensia governu nian tanba sira ne’e funsionariu publiku atravesa husi prosesu rekrutamentu,”Bianco esplika.
Tuir nia, iha Dekretu Lei Pre-deskonsentrasaun ne’e mos hamosu kona ba jestor administrasaun ninian iha nivel distritu.
“Sira dehan tuir lolos municipiu ona tanba lei uluk aprova ne’e distritu lakon ona mosu mak municipiu,”nia dehan.
