Medikus foun ne’ebe desloka ba iha area remotas iha distritu hotu, dadaun ne’e la hala’o sira nia servisu, tanba laiha kondisoens ba sira.
Tanba ne’e reprezentante povu iha Parlamentu Nasional, Deputadu Manuel de Castro Pereira husu governu atu kria kondisoens ba medikus sira ne’e.
“Iha Suku Waimori distritu Viqueque, hau to’o iha ne’eba laiha medikus ida iha ne’eba, hau husu ba sira dehan foin dadauk sira mai duni aprezenta an atu mai fali maibe to’o agora la mosu,” Deputadu Pereira dehan, iha Parlamentu Nasional.
Nia dehan, mediku sira ne’e hakarak tun to’o iha baze, maibe kondisoens mak la premiti ba sira. Governu tenke rezolve lalais problema ne’e liu –liu rezidensia no estradas, tanba ema moras hein hela medikus nia tulun.
Nia hatutan, katak problema sira hanesan ne’e la’os akontese deit iha suku Waimori maibe akontese mos iha fatin barak liu –liu area rurais.
“Hau lamenta tanba sira la marka prezensa, e hau mos fo sala ba governu tanba governu la prepara kondisoens ba sira,” Deputadu ne’e preokupa.
Alem de ne’e, nia mos lamenta ho projetu PDD nian ne’ebe hala’o iha suku Waimori liu –liu klinika iha tinan 2010-2011 to’o ohin loron seidauk realize material sira hanesan batako ema ida-idak foti arbiru deit.
Iha parte seluk komunidade sub-distritu Uatocarbau, Rosan da Costa, sente prekupa ho orario atendementu ne’ebe lao iha sentru saude Uatocarbau hahu tuku 10:00 to’o 12:00 deit lokraik medikus sira ba tiha deskansa pasiente emergensia sira mai tenke ba buka tuir iha uma tanba sira hala’o atividade privadu seluk.
“Hau ba iha ne’eba hau hare orario servisu la hanesan iha fasilidade saude sira iha nasional pesoal saude sira fo atendimentu konsulta dader no lokraik iha sentru saude Uatocarbaun mediku sira ba toba tiha iha uma pasiente mai mak ba bolu ne’e lalos,” Nia Lamenta.
Iha oportunidade husu ba Ministerio Saude kria planu ida diak hodi kontrola servisu sira hanesan ne’e tanba komunidade ba iha fasilidade saude atu hetan atendementu emergensia laos ba buka fali mediku sira hanesan daun lotuk.
