Durante fulan Setembru tinan 2013, total kazu asidente trafiku hamutuk 22 no husi numeru ne’e ema nain rua mak mate.
Komandate Tranzitu Nasional, Inspector Xefe Antonio L.C. Soares, hateten kazu 22 ne’e kompostu husi ema nain 15 hetan kanek kmaan, mate nain rua no kanek todan ema nain lima.
“Husi kazu sira ne’e prosesu tama tribunal ida, sei iha prosesu nia laran iha 13, no resolve familiar iha hitu,” Komandante Soares esplika, iha Kaikoli, Dili.
Kona ba kazu asidente ne’ebe rezulta ema nain rua mate ne’e, nia dehan, akontese iha distritu Bobonaro no Dili.
“Iha Dili ne’e mate tanba out of control no iha Bobonaro ne’e tanba kondisaun kareta la diak maibe obriga lori,” nia esplika tan.
Nia informa katak, iha fulan kotuk liu ba wainhira seidauk monta lampu tranzitu, total asidente akontese ho volume ne’ebe bo’ot, maibe hafoin monta lampu foun komesa menus ona.
Entretantu Deputadu Inacio Moreira, hateten iha nasaun ne’ebe deit sempre akontese asidente trafiku, maibe nia volume asidende ne’e mak diferente.
“Maibe hau hare komesa regularize ona, tanba lampu tranzitu ne’e komesa ativa ona, governu presiza toma atensaun bebeik, karik at bele atende lalais,” Deputadu Moreira sujere.
Nia mos apelu ba morista sira wainhira lori motor ou kareta karik, labele ho kondisaun lanu, tanba bele fo ameasa ba nia vida rasik no ba ema seluk nia vida.
