Jogu futebol sub under-19 se-Asia ne’ebe involve mos ekipa husi Timor-Leste ne’ebe hala’o iha fulan Setembru iha Indonezia, Timor-Leste hetan deit III lugar hafoin Indonezia no Vietnam, membru Parlamentu Nasional konsidera ida ne’e, tanba apoia husi familia ladauk masimu.
Prezidente Komisaun F ( edukasaun, saude, veteranus, desportu no igualidade jeneru), Deputadu Virgilio Hornai, hateten jogu ekipa Timor-Leste diak ona maibe seidauk masimu.
“Sira ba joga, inan aman ka familia tenke ser akompanha sira para fo moral,” Deputadu Hornai dehan, iha Parlamentu Nasional.
Tuir nia observasaun iha jogu ne’e, katak iha palku leten familia husi jogador Timor-Leste nian laiha atu fo apoiu.
Tuir lolos, jogu besi-besik iha nasaun sira ne’e estadu tenke tau osan ruma hodi hola tiket ba familia sira hodi partisipa ba joga refere, maibe durante ne’e laiha.
Tanba ne’e nia sujere, ba futuru estadu tenke harii asrama ida ba ekipa ne’e atu nune’e bele mos fasilita sira nia estudu, tanba jogador sira ne’e idade sei joven hela.
Maske nune’e nia dehan, ho III lugar ne’e, sira kontribui no lori ona Timor-Leste nia naran ba iha joga AFF.
Tanba ne’e, Parlamentu hanesan orgaun politika ninian fo parabens ba sira no espera katak iha future sira sei hatudu rezultadu ne’ebe diak liu ida ne’e.
Entretantu Deputadu Osorio Florindo, lamenta tanba maske ekipa ne’e lori bandeira Timor-Leste no mos kanta hino nasional patri-patria iha ema nia rai, maibe estadu rasik nein suporta buat ida.
Nia hateten maske Timor hetan terseiru lugar deit, tenke orgulhu tanba nasaun seluk mos bele konta ona TL nia naran iha mundu.
“Hau ba akompanha ita nia alin sira sub-19 ba joga mesmu ita lakon maibe ita terseiru lugar,” Deputadu ne’e dehan ho orgulhu.
Iha sorin seluk Vise Prezidente Parlamentu Nasional (PN), Deputadu Adriano do Nascimento lori parlamentu nia naran hato’o parabens ba ekipa sub 19 ne’e tanba esforsu maka’as hodi kompete iha eventu internasional.
“Ita apresia teb-tebes esforsu joven sira nian hodi kompete iha eventu internasional,” Vise PN apresia.
Tanba ne’e nia husu atu ema hotu fo korajen nafatin ba jogador sira ne’e atu nune’e bele lori nasaun ba oin nafatin.
