Komunidade Suku kaibada, sub-distritu Baucau Vila distritu Baucau halarik ba estradas, tanba estradas iha sira nia suku laran tinan 11 ona ho kondisaun at.
Xefe Suku Kaibada, Antonio Francisco Belo, hateten estrada iha Suku Kaibada no Suku Buruma ne’e hanesan estrada nasional, lolos governu tenke toma atensaun.
“Estrada ne’e halo kedas iha tempu Indonezia nian, ne’ebe agora at ona, nunka hadia ne’e duni nia kondiasaun ne’e grave tebes,” Xefe suku Belo preokupa, iha Baucau.
Nia mos informa, durante ne’e hatama ona proposta bebeik, maibe nunka iha reasaun husi governu atu hare ba estrada ne’e.
“Ami hatama ona proposta lubuk ida ona, maibe to’o agora seidauk resolve” Xefe Suku Belo dehan.
Entretantu Deputada Maria Angelica Rangel dos Reis, hateten estrada at la’os deit iha Baucau maibe kuaze ke iha fatin hotu.
“Agora ita hare dalan husi Dili ba Manatuto ne’e komesa diak ona, maibe Manututo ba Baucau ne’e mak seidauk,” Deputada dos Reis dehan.
Tanba ne’e nia husu ba komunidade sira atu aguenta oituan, tanba foin lalais, governu halo imprestimu osan ba governu Japaun atu halo estrada nasional husi distritu Baucau to’o iha viqueque.
Entretantu Administrador Distritu Baucau, Antonio A. Ximenes, hateten husi nia parte hatama ona proposta ba iha nivel nasional kona ba Estrada ne’e.
“Kuandu ligasaun estrada suku ba aldeia, ne’e ami nia kompetensia, maibe kuandu estrada nasional ne’e ami tenke hato’o ba nivel nasional,” Administrador Ximenes dehan.
Maibe, nia dehan, foin lalais husi Banku Mundial mai sukat ona estrada ne’e husi Baucau Flamboyan to’o Lautem.
“Ne’e ho objective atu hadia estrada, ne’ebe ba komunidade hein deit,” nia katak.
