Diretor organizasaun Luta Hamutuk, Mericio Akara sujere ba Banku Central Timor-Leste wainhira produs moeda karik, tenke ho transparansia atu nune’e labele hamosu diskonfia malu.
“Tanba saida mak fabrika husi Portugal mak produs ka cetak ita nia osan no nia prosesu oinsa, tenke transparansia,”Diretor Luta Hamutuk, Mericio Akara sujere, iha lansamentu moeda 100 sentavus, iha Banku Central Bairo Formosa, Dili.
Tuir nia, tenke klarifika, tanba saida mak Timor-leste fo fiar liu ba Kompania Portugal hodi produs moeda Timor nian.
“Tanba sa mak la’os ita nian rasik, karik ita nia seidauk mampu tenke esplika,” Akara preokupa.
Nia mos husu ba BCTL, atu halo sosializasaun ba iha komunidade sira to’o iha baze kona ba prosesu moeda ne’e no tenke halo estudu klean bainhira troka dolar Amerika no labele mosu krizi finanseira iha Timor.
Hatan ba preokupasaun ne’e Governador Banku Central Abrao Vas Concelho katak,Banku Central atu produs moeda iha Australia,Portugal ga Indonezia iha nasaun ne’ebe deit laiha kestaun.
Antes ne’e nia dehan, BCTL loke tender no iha kompania internasional hat husi nasaun hat (Indonezia, Australia, Englatera inklui Portugal) mak partisipa iha tenderizasaun ne’e.
“No ikus mai kompania Portugal YLCM mak manan, tanba priense rekizitus tekniku ne’ebe mak Banku Central fo sai,” Governador BCTL ne’e dehan.
Nia informa, iha estandar no padraun BCTL nian hateten, katak kuandu ida mak la liu husi tenderizasaun, BCTL la fo.
