Lixu iha sidade Dili husi loron ba loron kontinua nakonu iha fatin-fatin, tuir Administrador Distritu Dili, Gaspar Soares katak, ida ne’e akontese tanba lei sei fraku hodi fo sansaun ba ema ne’ebe soe foer arbiru.
Administrador Soares, dehan komunidade sira ne’ebe hela iha sidade Dili seidauk iha konsiensia diak hodi mantein sidade ne’ebe saudavel.
“Depois foer sira ne’e ita raut liu tiha, ema komesa soe foer fila fali,” Administrador Soares hato’o, iha serimonia divulgasaun dekretu lei pre-deskonsentrasaun no avaliasaun ba servisu Asministrasaun Distritu Dili, iha Hudi Laran, Dili.
Nia hateten, durante ne’e la forte atu fo sansaun ba ema ne’ebe mak soe foer arbiru.
Entretantu Sekretariu Estadu Desentralizasaun Administrativa, Tomas Cabral hateten, ema ne’ebe mak soe lixu barak liu, mak sira ne’ebe mak fa’an sasan sira.
“Sira fakar tiha ita ba raut tiha liu sira tau fila fali,”SE Cabral dehan.
Tanba ne’e, nia dehan, governu iha ona planu atu halo komemorasaun ba sidade Dili ba tinan 150 iha tinan ida ne’e.
“Iha ne’eba konselho do suku sira,xefe aldeia sira bele mos halo sensibilizasaun ba familia sobre lixu,” SE Cabral informa.
Nia hatutan, problema lixu hato’o tiha ona ba Administrasaun Distritu Dili no Sekretariu Estadu ba Agua no Saneamentu atu hadia kontentor 30 ne’ebe mak ahi han motuk tau hela iha Tibar, atu hadia fila fali hodi nune’e bele soe foer iha laran.
“Tanba ne’e mak hahu iha 01 de Outubru 2013 to’o 01 de Outubru 2014 grupu iha aldea no bairo sira, tenke tau lixu iha nia fatin,” SE Cabral katak.
Iha sorin seluk Sekretariu Estadu Agua Saneamentu no Urbanizasaun (SEASU), Elias Pereira Moniz husu ba sidadaun hotu nia partisipasaun hodi hamo’os iha ida-idak nia bairo no hela fatin.
“Hanesan Xefe Sukus, Xefe Aldeia inklui komunidade sira, tenke hamoos iha ida-idak nia bairo,” SE Moniz hato’o.
Partisipasaun autoriedade lokal no komunidade sira nian importante oinsa mak sidade Dili bele moos ho ambiente ne’ebe mak saudavel.
“Tenke komunidade ida-idak hamos lixu iha ida-idak nia uma oin atu nune’e bele lori lixu tau iha nia fatin,” SE Moniz hato’o.
