Organizasaun Working Women Center Timor –Leste ejiji ba governu atu kria lei espesifiku ida hodi regula no proteje direitu trabalhadora domestiku sira, tanba iha lei trabalho N. 4◦/2012 la iha artigu ida mak koalia kona ba direitu trabalhadora domestika sira.
Prezidente Board Working Women Center (WWCTL), Lorenço Tito Ximenes Lopes katak ejijensia sira ne’e bazeia ba artigu 2◦ alina tolu ne’ebe, hateten traballu domestiku sei hetan regulamentu iha lejislasaun especial, tanba ne’e governu iha obrigasaun atu kria lei ne’e.
“Molok tinan tolu ne’e remata (2013-2015), ami sei halo advokasia ho SEPFOPE hodi kria lei ida atu fo protesaun espesial ba domestic worker, tanba iha lei laboral No. 4/2012 temi deit katak sei kria,” Prezidente Lopes dehan, hafoin halo wokshop diskusaun planu estrategia WWCTL nian, iha Salaun Canossa, Balide, Dili.
Nia dehan, sira mos sei trasa asuntu ida ne’e ba iha planu estrategia organizasaun nian atu halo advokasia ba governu atu konsidera mos direitu trabalhu domestiku sira.
Iha parte seluk, Diretor Jeral Sekretariu Estadu Politika Formasaun Profesional no Empregu (SEPFOPE), Jacinto Barros Gusmão, hateten oras ne’e dadaun ekipa asesor legal sira elabora hela esbosu dekretu lei atu regula no proteje trabalhadora domestika sira inklui mos trabalhador Timor oan sira ne’ebe servisu iha estrangeirus.
“Ita hakarak iha tinan ida ne’e bele aprova ona, ne’e para tinan oin bele implementa ona, ne’ebe ami agora hakas an ho legal sira atu hare liu –liu trabalhadora domestika,” DJ Gusmão dehan.
Nia rekonese katak, salario minimu seidauk implementa ho maximu liu –liu trabalhadora domestika sira, tanba difisil atu kontrola no servisu la ho kontratu.
