Reprezentante povu iha Uma Fukun Parlamentu Nasional, husu ba povu tomak atu halo reflesaun ba loron 30 Agostu ne’e, tanba iha loron ne’e mak povu Timor espresa no determina sira nia vida liu husi referendum, ne’ebe ikus mai hetan independensia.
Membru Parlamentu husi bankada Fretilin Deputadu Leonel Marcal, hateten iha loron 30 Agustu 1999, tinan 14 liu ba povu tomak taka sira nia uma hodi ba tuir hotu eleisaun, hodi determina sira nia distinu.
“Ida ne’e ita hotu tenke halo reflesaun para ita hotu hanoin, katak independensia la’os monu husi lalehan no fo gratuita, maibe independensia ita hotu –hotu nia luta, balun to’o terus no balun to’o lakon nia vida,” Deputadu Marcal katak, iha Parlamentu Nasional.
Entretantu Deputadu husi bankada Partidu Demokratiku (PD), Paulino Monteiro, hateten loron 30 Agostu loron vitoria ba Timor-Leste.
“Tanba ne’e ita tenke festeja ba loron ida ne’e. Iha tempu defisil ita hotu hamutuk lori malu, dada malu ba vota to’o ikus mai maioria manan hodi hetan nia rezultadu iha votasaun,” Deputadu Monteiro hateten.
Deputadu ne’e realsa tan katak,loron ida ne’e tenki hatudu ba jerasaun foun sira atu nune’e bele hatene diak liutan.
“Mensajen mak ne’e ita hotu tenki valoriza loron ida ne’e, tanba loron ne’e loron istoriku ne’ebe mak ita fo an ba luta hodi hetan independensia,” Deputadu Monteiro hato’o.
Entretantu Ministru Administrasaun Estatal (MAE), Jorge Teme hateten, maske la hasa’e bandeira iha loron determinasaun ida ne’e, maibe sei hala’o atividades balun hodi komemora loron ne’e.
Nia dehan, atividade ne’ebe mak sei halao ba loron importante ne’e mak hanesan, 29 de Agostu limpeja jeral ne’ebe mak sei hahu iha tuku 7 :00 to’o tuku 11:00 no ida seluk mak 30 de Agostu dader 6:00 sei hala’o marsa saudavel husi Palacio do Governu to’o Masjid An’nur.
“Depois ita fila fali ba iha ne’eba, iha ne’eba mak foin rona mensajen husi ita nia lider masimu sira husi ita nia Primeiru Ministru ,” Ministru Teme dehan.
Alem de ne’e, nia dehan, sei iha atividade divertimentu tebe daur ne’ebe mak mai husi sub-distritu hat iha sidade Dili atu aprezenta dahur inklui mos dada rifa ba partisipante sira ne’ebe mak partsipa marsa saudavel ne’e.
