Komandante Polisia Distritu Dili, Pedro Belo hateten sira sei halo operasaun maka’as liu tan iha bairo-bairo ne’ebe risku ba konflitu, iha Dili laran.
Komandante Belo dehan, operasaun tama sai bairo ne’e bazeia ba rezolusaun ne’ebe mak governu hatun ona ba iha Komando Geral Polisia Nasional Timor-Leste (PNTL).
“Ami sei halo operasaun maka’as liu tan ba iha bairo-bairo sira, hanesan iha Becora Temporal no seluk tan,” Komandante Pedro Belo dehan, bainhira sobu eis Hotel Resende, iha Dili.
Operasaun ne’e hala’o relasiona ho konfrontasaun ne’ebe mak kontinua mosu iha bairo-bairo ikus-ikus ne’e, tanba ne’e Komandante Belo, dehan sira firme nafatin rezolusaun husi governu ne’ebe hatun ona ba iha komando.
“Ami ezekuta nafatin ba grupu-grupu sira ne’ebe iha planu atu halo rungu-ranga iha Dili,” Komandante Belo hateten.
Kona ba konflitu ne’ebe kontinua mosu iha rai laran entre grupu ka sukus, tuir Deputadu Cesar Valente de Jesus, katak ne’e la’os problema arte marsiais maibe ne’e problema urbana.
“Hau hatete fila-fila ona, katak ne’e konsidera violensia urbana, grupu atake grupu, suku ida ba ataka suku ida, ne’e la’os arte marsiais,” Deputadu husi bankada Congresu Nasional Rekonstrusaun de Timor (CNRT) ne’e dehan.
Tanba ne’e, nia husu ba PNTL, tenke hala’o operasaun iha tempu kalan ho rutina, nune’e Dili laran bele hakmatek.
Iha sorin seluk komunidade Becora, Jose Soares, katak iha loron 14 fulan Julhu kalan, grupu joventude Becora halo konfrontasaun tuda malu.
“Horkalan tuda malu rame loos, husi Becora Au-hun ho Becora merkadu mak tuda malu,” Soares dehan.
Husi tuda malu ne’e, nia dehan, ema nain ida mak konsege hetan kanek. “Horkalan serang malu ne’e kolega husi Baucau-Laga nian mak hetan kanek,” Soares katak.
Kona ba motive saida mak grupu rua ne’e tuda malu, Soares dehan, sira ladun lahatene loos.
