Prezidente Komisaun Nasional ba Direitu Labarik (KNDL), Komisaria Adalgiza Ximenes hateten iha programa lubuk ida mak trasa ona iha planu estratejiku durante tinan hat nian hanesan programa promosaun, asistensia no kapasitasaun.
Iha tinan kotuk, nia afirma, KNDL halo ona advokasia ba asuntu espesifiku balun hanesan problema mal nutrisaun, merenda eskolar no ba tinan ida ne’e sira sei focus ba asuntu trafiku humanu no neglijensia tanba labarik barak mak involve iha trabalho infantile. “Ba tinan ida ne’e ami sei halo advokasia espesifiku liu, ami halo sosializasaun ida ba trafiku ba labarik no neglijensia ne’ebe sei hala’o iha terseiru trimestra ne’ebe sei hala’o iha distritu lima,” dehan Komisaria Adalgiza Ximenes, foin lalais, iha Colmera Dili.
Distritu lima ne’e mak hanesan Distritu Baucau, Bobonaro, Suai, Oe-Cusse no Distritu Dili. Iha Dili sei foka liu asuntu neglijensia tanba falta atensaun husi inan aman labarik barak moris iha luron ibun.
Komisaria ne’e hatutan, programa ne’e realize tanba KNDL servisu hamutuk ho organizasaun Forum Komunikasaun Feto Timor –Lorosa’e (FOKUPERS), Igreja inklui mos husi Gabinete Primeira Dama nian.
Entretantu Jerente Programa Advokasia Fundasaun Alola, Alzira Reis hateten, iha labarik feto barak mak sai vitima ba trafiku domestiku tanba ne’e programa sosializasaun importante tebes ba povu atu komprende.
“Ba ami nudar organizasaun feto iha komitmentu nafatin hala’o servisu, maske ami ho ami nia fundus ne’ebe ki’ik no ami sei uza mekanismu seluk hodi sosializa informasaun trafiku humanu ba komunidade,” tenik Jerente Reis.
Nia informa, iha tinan 2011-2012 sira identifika vitima trafiku humanu domestiku, iha labarik feto nain rua husi distritu mai Dili no iha membru familia ida bolu sira ho promesas ba sira katak sei hatama ba eskola. “maibe realidade la ba eskola sai fali atan iha familia ne’e, e ikus mai hetan violasaun seksual,” Jerente Reis katak.
