Diretor Servisu Investigasaun Kriminal (SIK), Superintendente Calisto Gonzaga hateten, to’o agora ruin saudozo seidauk halo identifikasaun tanba familia husi saudozu Mauhudu la kolabora ho polisia SIK hodi halo teste DNA.
“To’o agora familia la konkorda atu elabora ho prosesu ne’e, tanba ne’e ita presiza governu nia intervensaun oituan atu aprosima ho familia,” sujere Diretor SIK, Superintendente Calisto Gonzaga, foin lalais, iha Kaikoli, Dili.
Nia hatutan, atu identifika anti morten no teste DNA so hetan husi familia, kuandu ne’e maka laiha, susar atu indentifika mate ruin ne’ebe maka agora dadaun sei iha mortuariu laran.
“Ami sei hein nafatin bainhira los maka familia bele kolabora ho ami,” dehan Diretor SIK ne’e.
Alem de ne’e nia afirma, Polisia SIK mos husu ba governu atu identifika nasaun tolu hanesan Australia, Korea no Malaysia, ajuda Timor-Leste hodi bele identifika ruin sira ne’e tanba Timor seidauk iha fasilidade kompletu.
Iha lidun seluk Deputadu Inacio Moreira hateten, familia lakohi kolabora tanba wainhira ke’e mate ruin ne’e husi familia laiha konesementu ida.
“Hau hatene duni wainhira ba aruma ita nia saudozu Mauhudu ninia ruin ne’e laiha koordenasaun ho ninia familia,” dehan Deputadu Moreira.
Tanba ne’e mak, nia informa, to’o ohin loron seidauk bele identifika mate ruin ne’e tanba mosu dezintendimentu entre familia saudozu, Governu no ema ne’ebe maka hatudu an nudar testamunha katak ruin ne’e nudar saudozu Mauhudu.
