Tuir Diretora Ezecutivu Rede Feto (RF), Jacinta Luziha katak meus ne’ebe sira uza atu hetan fundus alem de halo aprosimasaun ho doadores internasional no nasional sira, sira mos fa’an tiket ho folin $ 5, 15, 25 direitamente ba serimonia Coctail Valentine day ho tema “iha domin iha igualidade”.
“Ami mos hatama ona proposta ida ba iha parlamentu nasional liu husi GMPTL atu ir abele hare hamutuk iha plenaria oinsa bele supporta oituan hodi hala’o kongresu ba feto Timor ne’e,” dehan Diretora Ezecutivu RF, Jacinta Luzinha, (08/02), iha Kaikoli, Dili.
Kongresu Nasional Feto ne’ebe ho tema “Haforsa Partisipasaun Feto iha Asaun no Progresu ba Dezenvolvimentu Nasional”, Diretora RF ne’e afirma katak hili tema ida ne’e tanba durante ne’e partisipasaun feto seidauk to’o mehi ne’ebe feto sira iha no presiza haforsa liu husi asaun atu sira ativu liu tan iha setor hotu ho masimu intermus de kualidade.
Tuir planu, Kongresu Nasional Feto sei hala’o durante loron tolu (22-24 Abril), tuir Diretora Luzinha katak sei iha workshop direita husi reprezentante feto sira no instituisaun governu atu sira rona rasik preokupasaun feto sira nian ba asusntus relevante ho feto nia moris hanesan saúde, agrikultura, justisa, ekonomia, dezenvolvimentu, ne’ebe sei observa husi observador internasional no nasional sira.
Iha parte seluk, Prezidente Grupu Feto Parlamentares Timor-Leste (GMPTL), Deputada Josefa Alvares Soares katak kongresu ne’e importante tebes tanba iha kongresu ne’e mak sei hamosu plataforma unika ida atu ema hotu bele implementa tuir plataforma ne’e hodi hasae nivel moris feto nian.
“Foin dadauk sira mai hasoru duni GMPTL maibe ami labele halo proposta ida ne’ebe responde direita sira nia nesesidade tanba governu tau ona osamentu ho montante $ 18 Miloens ba sosiedade sivil sira agora ba fila fali rede feto mak tenke lalais badinas atu hasoru responsabel sosiedade sivil atu sira nia proprosta bele hetan aprovasun,” dehan Prezidente GMPTL Soares.
