Tuir Deputada Maria Angelica Rangel katak lolos governu muda hotu negosiante sira ne’e, nune’e ema hotu bele ba sosa modo iha merkadu Manleuana.
“Ita hare loro-loron sira hakilar dehan sira nia sasan to’o dodok ema la sosa tanba governu la iha jestaun atu haruka ita nia vendedor ba fa’an sasan iha ne’eba,” dehan Deputada Maria Angelica Reis, (01/02), iha Parlamentu Nasional.
Deputada ne’e hatutan, iha orsamentu jeral ba tinan ne’e, governu propoin tan orsamentu atu hadia diak liu tan kondisaun merkadu inklui merkadu Manleuana maibe importante mak tenke hadia jestaun.
Entretantu Negosiante ne’ebe fa’an iha Merkadu Manleuana, Natalino de Jesus hateten,durante sira fa’an iha merkadu ne’e sira nia sasan la folin tanba ema ladun asesu ba iha ne’eba.
Negosiante ne’e dehan, ida ne’e tanba impkatu husi negosiante barak mak sei fa’an iha dalan ninin sira no seidauk muda hotu ba iha merkadu ne’eba.
“Hau husu ba governu tenke muda hotu negosiante sira iha dalan ibun sira ne’e ba fa’an hotu iha merkadu atu nune’e labele fo impaktu ba ami nia sasan sira,” Negosiante ne’e sujere.
Hatan ba preokupasaun ne’e Administrador Distritu Dili, Gaspar Soares katak, sira sei halo luan tan merkadu ne’eba.
“Rai hectares tolu ami identifika ona iha merkadu nia kotuk e rain ain mos hatene ona, neste momentu ami haruka ona ba mais seidauk iha desizaun husi ministeriu komersiu,”Administrador Soares katak.
Nia dehan, bainhira merkadu Manleu halo luan tiha mak foin bele muda hotu negosiante sira ne’ebe fa’an iha dalan ibun hanesan iha Loza Leader oin, Merkadu Comoro inklui iha Loza Elemlo’i Delta nia oin.
“Agora dadaun seidauk bele tanba fatin la to’o,” dehan Administrador Distritu Dili. n
