“Iha kuartu governu konstitusional iha 2007 membru do Governu hotu-hotu obrigatoriamente halo deklarasaun kona ba aset pejabat sira haruka ba iha Tribunal Rekursu, maibe Parlamentu seidauk kria lei kona ba ida ne’e,” hateten Vise Prezidenti Parlamento Nasional (PN), Deputadu Aderito Hugo (10/08) iha PN, Dili.
Tuir nia, sistema ida ne’e bele mos ba Membru V Governu inklui membru Parlamentu Nasional atu banati tuir hodi deklara sira nia riku soin ho obrigatoriu.
“Asuntu ne’e ami iha diskusaun informal deit. Ami sei hare oinsa iha terseira lejislatura ida ne’e ami bele hanoin katak, iha projetu lei ruma kona ba deputadu sira ou bele mos inisiativa governu atu bele avansa lei ida hodi regula; la’e ita temi deit deklarasaun riku soin membru do Governu sira intrega ba iha Tribunal Rekursu maibe nia kontinuasaun saida,” Vise PN ne’e afirma.
Entretantu Deputadu Virgilio da Costa Hornai hateten ne’e hanoin ne’ebe diak nune’e bele asegura boa governasaun iha governu nia laran.
“Hau sente ita bo’ot sira hatene, publiku mos hatene katak membru Parlamentu atu halo korupsaun ba saida, iha ne’e situasaun real, Parlamentu lor-loron mai halo debate, aprova lei,” dehan Deputadu Hornai.
Nia hateten, publiku presiza hatene riku soin ne’ebe membru Governu no membru Parlamentu sira iha antes sai deputadu ka ministru.
“Mais to’o agora ami sidauk hetan instrusaun husi Parlamentu ninian liu-liu ami atu priense formulariu hodi deklara ami nia asset,” Deputadu Hornai katak.
