“FALINTIL ne’e saida? FALINTIL ne’e povu nia oan ne’ebe defende no la hamohu historia Timor Lorosa’e nian,” dehan Xefe Estadu Maior Jeneral (MJ) Lere Anan Timor, iha nia diskursu durante komemorasaun loron FALINTIL ba dala 37 iha Palasiu Governu, Dili (20/08).
Iha komemorasaun loron importante ne’ebe marka ho feriado nasional ne’e, MJ Lere fo homenajen ba eroi sira ne’ebe mak defende hodi liberta Timor-Leste atu hetan liberdade.
MJ Lere mos gaba katak durante iha ailaran funu-nain FALINTIL sira disiplinadu, organizadu, hatene halo planu, hatene hatudu dalan no fiar malu maske moris susar no terus nia laran maibe ikus mai Timor hetan duni independensia.
“Ida ne’e hanesan riku soin ida ne’ebe sira hatene hodi husik hela ba jerasaun foun ne’ebe mak sei tuir mai,” MJ Lere tenik.
Nia fo homenajen ba Frente Klandestina no mos ba Frente Diplomatiku ne’ebe mak hela iha sidade hodi fo tulun ba FALINTIL sira iha ai laran.
Iha nia lia-menom ba Forsa Defeza Timor-Leste (F-FDTL), nia husu atu hatudu ezemplu ne’ebe mak diak no sai inspirador ba sidadaun hotu.
Entretantu Vise Ministru Edukasaun Virgilio Smith dehan ho selebrasaun loron FALINTILl ba dala 37 presiza duni fo homenajen ba eroi sira hotu ne’ebe uluk luta ba ukun rasik ida ne’e.
“Dever no obrigasaun ba Timoroan hotu-hotu atu partisipa ba seremonia selebrasaun ida ne’e.”
Tuir nia mos, Timoroan barak mak familia mate no terus hodi luta ba ukun rasik an e servisu F-FDTL agora hanesan kontinuasaun saida mak FAILINTIL sira halo ona durante tinan 24 iha ai laran.
Alende ne’e Eis Asistente FALINTIL durante iha ai laran, Juliana Hendrique Boavida (Biroja)
sujere ba F-FDTL atu dezenvolve diak liu tan instituisaun ida ne’e iha futuro.
“Forsa Defeza Timor-Leste tenke mantein nafatin prinsipiu iha tinan 1975 nian, kaer metin unidade nasional atu nune’e lori prosesu dezenvolvementu ne’e ba oin.”
