Durante mandatu Governu Aliansa Maioria Parlamentar (AMP), Ministeriu Saúde (MS) servisu hamutuk ho Ministeriu Justisa (MJ) konsege estabelese Postu Ospitalar iha Ospital Nasional Guido Valadares (HNGV) hodi halo rejistu ba bébé sira ne’ebe moris hodi hetan sertidaun RDTL, e total bébé ne’ebe hetan ona sertidaun RDTL hahu Janeiru to’o Junu tinan ne’e hamutuk 860 bébé.
“Hahu husi Janeiru to’o Junu, bébé ne’ebe hetan sertidaun RDTL hamutuk Oitu sentus e seis senta (860), fulan ida bébé ne’ebe halo rejistu iha HNGV entre 60 to’o 120 bébé,” informa Diretor Rejistu Sivil Distritu Dili, (07/08), iha Kaikoli, Dili.
Alende HNGV, Postu Ospitalar estabelese mos iha Ospital Referal Baucau (ORB)no Ospital Referral Oe-Cusse (ORO), maibe iha ospital referral rua ne’e ladun barak.
Diretor ne’e dehan, maske foin estabelese iha ospital referral rua no nasional maibe la taka dalan ba Parteiras, Enfermeirus no Official Rejistu Sivil sira atu utilize meus hanesan prense livru notifikasaun saúde inan ho oan atu bele hetan sertidaun RDTL iha sentru rejistu sivil iha distritu ida–idak.
Ba future Rejistu Sivil no Notariadu mos iha ona planu atu estabelese Postu Ospitalar iha Ospital Referal (OR) hirak ne’ebe seidauk inklui Sentru Saude hotu, nune’e komunidade iha area rurais bele asesu hotu.
“Agora foin estabelese iha ospital referral rua inklui ospital nasional tanba ita nia rekursu umanu ne’ebe sei limitadu inklui mos finanseira, entaun ita estabelese faze pur faze,” dehan Diretor Neto.
Iha lidun seluk Reprezentante Povu iha Parlamentu Nasional (PN), Deputada Josefa Alvares Soares katak importante tebes estabelese Postu Ospitalar iha OR nune’e labarik ne’ebe moris mai hetan kedas sertidaun RDTL nian.
“Liu-liu Funsionariu Publiku sira nia oan tanba sei iha subsidiu ba funsionario sira nia oan no se sai oan kiak riku soin ne’ebe labarik nia inan aman iha, bele fo ba oan sira bazeia ba sertidaun ne’ebe iha,” dehan Deputada ne’e.
“Se postu ne’e mak la estabelese entau instituisaun ida labele konsidera katak labarik ida ne’e ema ida ne’e nia oan tanba ne’e desde moris mai ne’e tenke iha kedas sertidaun RDTL la’os sertidaun batismu deit, labarik sira iha direitu atu hetan dokumentus ida ne’e,” Deputada ne’e tenik.
