“Ita bo’ot hatene sira ne’ebe primeira lejislature simu hela tinan hira nia laran simu 100 pursentu husi salariu baziku, hodi rekonese sira hanesan deputadu tuir lei ne’ebe define,” hateten Deputadu Aderito Hugo, iha Uma Fukun, Dili.
Tuir nia, eis titulares sira ne’e iha direitu deit atu simu sira nia salariu baziku maibe ba abonu reprezentasaun, sira la simu.
“Ne’e la’os ba deputadu sira deit, maibe ba mos membru do Governu sira, se sira sai husi membru Governu sira iha direitu atu halo rekerimentu ba titulares ninian,” Deputadu Hugo dehan.
Iha sorin seluk Deputadu Pedro da Costa hateten maske lei pensaun vitalisia ne’ebe mak oras ne’e dadauk pendenti hela iha Parlamentu vale nafatin hodi uza lei ne’e fo pensaun ba eis titulares sira.
“Enkuantu ladauk muda lei ne’e buat hotu-hotu sei mantein,deputadu sira nebe kumpri ona ninia mandatu tuir tempu nebe determina tuir lei pensaun nebe mak fo,”deputadu da Costa katak.
Deputadu ne’e afirma, lei pensaun vitalisia ejisti tiha ona iha primeira Governu Konstitusional hodi fo pensaun ba eis titulares sira, maibe iha segundu Governu Konstitusional atu altera maibe la konsege mais lei ne’e sei vale nafatin.
“Deputadu sigunda legislature mos komo lei ne’e sidauk muda,tuir lei sira mos iha direitu ba pensaun vitalisia ne’ebe mak iha,” Deputadu da Costa katak.
Iha fatin hanesan Deputadu Mario Viegas Carrascalao dehan, presiza fo pensaun ba kareira funsionariu nian ne’ebe mak durante ne’e servi ba nasaun.
“Vitalisia ida ne’e buat seluk ida,hau bele konkorda mak pontu subsidiu ida,re integrasaun ba fali sosiedade ga ne’e diak liu du ke pensaun vitalisia ne’e,” hateten Deputadu Carascalao.
