Komisaun Funsaun Publiku (KFP) sei autoriza fundus pensaun tipus tolu hanesan pensaun ba idade, pensaun invalids no pensaun ba feto faluk no oan kiak ba Funsiunariu Publiku (FP) hamutuk 1.000 iha tempu badak.
“Oras ne’e dadaun Ministeriu Solidariedade Sosial (MSS) ho Komisaun das Funsaun Publika halo preparativu konsiliadu dadus kompilia atu hare se se mak benefisiariadu,” hateten Prezidenti das Komisaun Funsaun Publika, Liborio Pereira, iha Colmera, Dili.
Prezidenti KFP dehan, iha grupu tolu mak sei reforma ba tinan ne’e ,mak hanesan, ida reforma ba idade, grupu ida ba invalides, no grupu seluk tan mak feto faluk no oan kiak sira.
“Depois de preparasaun remata bele hahu halo pagamentu ba sira, mas ita nia lei ne’e fo mos oportunidade ba funsiunariu sira atu manifesta sira nia protidaun ba reforma,” dehan Prezidente KFP ne’e.
Entertantu Kordenador Nasional Timor-Leste Coalition for Education (TLCE), David Bendito da Silva hateten, iha Profesor balun maske la tama hanorin kleur ona maibe kontinua simu osan kada fulan.
“Pior liu tan hau lee notisia iha jornal independenti kona ba profesor siluman, katak profesor sira ne’e mate ka reforma tiha ona, mas nia naran eziste nafatin e ema seluk mak ba asina lor-loron ba simu fali osan,” Kordenador TLCE da Silva kestiona.
Situsaun ida ne’e akontese iha eskola balun iha distritu sira e agora dadaun la’o hela. “Ami sei halo peskiza ba ida ne’e, ema ida tur iha uma la ba hanorin, to’o fulan simu osan,tanba maluk sira mak diretor rejional ne’ebe kunfia malu,” Kordenador TLCE ne’e preokupa.
Tanba ne’e nia parte husu ba KFP atu tau atensaun ba kestaun ne’e, nune’e orsamentu estadu nian bele uza tuir nia dalan ho diak.
