Diretor Jeral Ministeriu Edukasaun (DJ-ME), Apolinario Magno dehan, Tetun la presija hanorin tan iha eskola sira tanba ema barak mak hatene koalia lian ne’e no sai lian komunikasaun loron-loron nian.
“Segundu pontu hau hakarak hateten katak, Tetun ne’e mos lingua ida seidauk kompletu para uja iha akademiku ka iha edifisiu,” hateten DJ. Apolinario Magno, (05/07), iha Vilaverde, Dili.
Tuir nia, agora lian Portugues mak presiza dezenvolve tanba lian ne’e defisil , e tenke haka’as aan hodi aprende.
Kona ba dezenvolve lian Tetun, Diretor ne’e afirma, ne’e knar Instituisaun Nasional Linguistika (INL) nian, e bainhira lian Tetun iha verbu ne’ebe perfeitu ona, bele uja hanesan lian ofisial ka lian instrument.
“Husi parte edukasaun nian ami iha ona Printing Centre ida atu hare kona ba testu ida hakerek ho lian Tetun,” DJ. Magno katak.
Tanba ne’e nia parte husu atu labele preokupa demais liu ho lian Tetun, tanba “Tetun ita nia rasik ne’ebe koalia lor-loron iha ba ita uma laran,”.
Iha parte seluk Sekretariu Jeral Sindikatu Profesores (SPTL , Francisco da Costa Fernandes hateten ME rasik kontra ona konstituisaun tanba livrus sira ne’ebe distribui ba iha eskola sira ho lian Portugues, e Tetun laiha.
“Ita nia konstituisaun konsagra ona lian rua hanesan lian Tetun ho Portugues hanesan lian ofisial Timor-Leste ninian, mais livru sira nebe mak iha hotu-hotu uja lian Portugues,la iha ida uja lian Tetun,” SJ.SPTL, Fernades kritika.
Tuir nia, lian Tetun bele lakon iha tinan 20 ka 30 oin mai, tanba governu la fo importansia ba dezenvolvementu lian ne’e.
Entertantu Deputadu Mateus de Jesus katak, lian ofisial Timor-Leste nian mak Tetun no Portugues tanba ne’e lian rua ne’e presiza dezenvolve hotu.
“Hau hanoin sala karik ministeriu edukasaun hateten hanesan ne’e,” dehan Deputadu de Jesus via telefone.
