Taxista kontinua la kumpri regras, sei multa 70 dolar

Polisia Tranzitu Nasional sei hasa’e multa ba Taxista sira ne’ebe kontinua la kumpri regras tranzitu nian hodi tau vidru metan (reben).

“Bainhira nia hetan prende ona, maibe halo nafatin mak hetan prende tan antaun sei hasa’e multa husi US$ 50,00 ba US$70,00,” dehan Komandante Polisia Tranzitu Nasional, Superintendente Antonio L.C. Soares, (28/06), iha Kaikoli, Dili.

Tuir Komandante ne’e, dala barak ona sira halo operasaun ba taxi ne’ebe uza vidru metan, sempre hetan ema ne’ebe maka hanesan.

Tuir lei artigu ida pontu 2, motorist ne’ebe la kumpri regras tranzitu nian sei selu multa US$ 50,00, maibe kuandu halo be-beik ona tenke hasa’e, nune’e sira labele halo tan.

Iha parte seluk Deputada Josefa Alvares Soares, dehan sidadaun hotu, liu-liu motorist sira tenke kumpri regras ne’ebe iha.

“Ema tenke kumpri ba lampu tranzitu, no karik polisia bandu atu labele tau vidru metan, tenke kumpri,” dehan Deputada Soares.