“Iha tempu governu AMP ne’e iha konfuzaun barak kona ba imunidade no priviléjiu ba PN, tanba ne’e ami hakarak fo hanoin ba PN future mai, oinsa maka bele asegura katak imunidade no direitu priviléjiu ne’e la sai impedimentu ba atu asegura justisa ba ema hotu,” hateten Diretor Ezekutivu JSMP, Luis Oliveira Sampaio, (29/06), bainhira lansa relatoriu JSMP nian kona ba previlejiu no imunidade ba PN, iha Colmera, Dili.
Iha Konstituisaun RDTL artigu 94 fo previlejiu parlamentar ba membru PN atu lahatan ba prosedimentu sivil, criminal no indisiplinar ne’ebe iha relasaun ho sira nia votasaun ka opiniaun durante sai deputadu, no imunidade parlamentar bele hasai tuir rejimentu parlamentar nian.
Tuir Diretor JSMP Sampaio, sira sei lori relatoriu ne’e atu debate iha Parlamentu Nasional, nune’e membru PN foun bele mos iha konesementu ba kestaun ne’e.
“Rekomendasaun ne’e PN foun tenke tau iha pratika, ami sei halo diskusaun iha PN ho partidus politiku ne’ebe maka sei tur iha PN,” dehan Diretor Sampaio.
Enkuantu iha artigu 114 kona ba imunidade ba membru governu nian, katak membru governu ida labele dadur ka detidu bainhira parlamentu seidauk fo lisensa bainhira halo krimi ruma ne’ebe bele simu sentensa ho limita masimu tinan rua no hetan kapturasaun durante halo hela asaun criminal (flagrante delicto).
Tanba ne’e JSMP rekomenda, atu halo revizaun ba lei artigu 8 rejimentu internal PN hodi emenda tiha imunidade ne’ebe luan tebes ba membru PN husi prosedimentu criminal.
Entertantu Prezidente Komisaun A Parlamentar, Deputada Fernanda Borges, kongratula ba JSMP ne’ebe halo ona relatoriu ne’e, maibe husu ba Juis sira atu ezerse sira nia funsaun ho diak.
“Juises ho prokurador sira, iha dever ida atu mos interpreita konseitu no prinsipiu sira ne’e sein tauk,” dehan Prezidente Komisaun A Parlamentar ne’e.
Alende ne’e Juis sira mos bele foti desizasaun ne’ebe maka diak tuir sira nia funsaun,nune’e labele tau todan fali ba PN.
