Maske Organizasaun Non Govermental (NGO) barak mak fo apoiu ona ba iha ema defisiente sira inklui governu liu husi Ministeriu Solidaridade Sosial (MSS) kada fulan fo subsidiu ba sira atu hatutan sira nia moris, maibe realidade defisiente balun kontinua tane liman (pengemis-Indo) iha dalan ninin no fatin publiku sira.
“Programa hotu hala’o ona, depende ba ema defisiente sira, sira tenke esforsu aan. Ezemplu se sira iha grupu alfaiate ida, atu dezenvolve sira nia grupu ne’e tenke servisu maka’as, governu labele fo osan ba ema hotu maske defisiente, kuandu la tama kriteria nia la hetan subsidiu,” dehan Diretor Nasional Asistensia Sosial Ministerio Solidaridade Sosial (MSS), Amandio Amaral Soares, (03/07), iha Bemori, Dili.
Diretor ne’e esplika, kriteriu defisiente ne’ebe atu hetan subsidiu husi MSS mak, ema ne’ebe ho kondisaun invalid (labele halo buat ida tur deit fatin).
Nia mos rekonese katak, iha defisiente balun mak seidauk hetan oportunidade atu asesu ba programa ne’ebe governu no NGO sira iha durante ne’e.
Maske nune’e MSS rasik seidauk iha dadus ne’ebe klaru kona ba ema defisiente sira iha teritoriu tomak, tanba seidauk halo survey ida, maibe bazea estatistika sensu uma kain iha 2010, hatudu katak total ema ho kondisaun defisiente hamutuk 44 mil e tal.
Iha parte seluk Diretor Fundasaun Ahisaun (FA)ne’ebe durante ne’e fo kapasitasaun ba defisiente sira, Mario Cardoso hateten, durante ne’e sira hato’o ona sira programa ba publiku liu husi pamfletu inkui media (Televizaun no jornal).
“Iha Timor-Leste organizasaun 12 mak fo atensaun ba ema ho kondisaun defisiente no ami mos iha programa disability working group atu promove defisiente sira, nune’e sira labele hela iha liur tane liman ba ema seluk, tanba sira iha kapasidade para bele buka sira nia moris,” dehan Diretor Cardoso.
