Iha pagamentu subsidiu veteranus nian ne’ebe hala’o durante loron rua (15-16 Junu) foin lalais iha banku Mikrofinansas Dili, veteranus balun lamenta tanba sira nia naran la taka iha lista pagamentu nian.
Veteranus Clementino Soares, lamenta tanba hafoin halo viajen husi Distritu Manatuto mai Dili no forma linha naruk ho intensaun atu simu osan veteranus nian, maibe bainhira cek naran iha lista pagamentu nian, naran laiha.
“Ohin hau mai lori surat rekening husi Banku Nasional Ultramarino (BNU) mai iha ne’e cek naran maibe hau naran la iha fali,” lamenta Veteranus Soares, (25/06), iha Edifisiu Sekretariu Estadu Antigu Kombatentes ba Libertasaun Nasional (SEAKLN), Kaikoli, Dili.
Lamentasoens hanesan hato’o mos husi Veteranus Joao Dias (alejadu), ne’ebe seidauk simu sira nia direitu maske naran taka iha lista ona.
“Hau halo surat alejadu nian ami nain tolu mak mai hatama ami nia surat, maibe ami nain tolu to’o agora seidauk simu ami nia osan,” Veteranus Dias lamenta.
Entretantu hatan ba lamentasoens ne’e, Funsionariu husi Departementu Pensaun Subvensoens iha SEAKLN ne’ebe lakohi publika nia naran ba publiku, katak veteranus balun ne’ebe mak laiha naran iha lista tanba iha failansu tekniku.
“Sira nia naran la lakon ida,”dehan Fontes konfirmadu ne’e.
Kona ba bainhira mak sira hirak ne’e bele simu sira nia direitu hanesan ho sira seluk, nia dehan ne’e kompetensia SEAKLN atu deside.
Tanba tuir nia, wainhira dokumentus veteranus sira nian la’o los no kompletu ona, haruka ba banku hodi simu.
“Maibe ba banku mak ita bo’ot hare mak osan seidauk tama, ne’e depende ba iha banku tanba iha ne’e ami haruka tiha ona ba iha banku,” Fontes konfirmadu ne’e esklarese.
Enkuantu ba sira ne’ebe seidauk hetan pagamentu iha primeira faze ne’e, sei simu fali iha segunda faze nian ne’ebe sei hala’o pagamentu iha Setembru dia 15, tinan ne’e, no terseiru pagamentu sei halo iha Novembru dia 15 mos.
