Fundasaun Ahisaun (FA) mak organizasaun ida ne’ebe durante ne’e luta ba direitu defisiente sira nian, alende asesu ba edukasaun formal, mos non formal fo kapasitansaun ba joventude defisiente sira, prepara sira nune’e sira mos bele partisipa iha prosesu dezenvolvementu nasaun nian.
“Programa ne’ebe ami halo iha ne’e mak treinamentu ba komputador, muzika, lingua, agrikultura, kuda ai funan no seluk, ho objetivu atu hasa’e sira nia kapasidade, hodi fiar an liu –liu sira iha area rurais labele sente an hanesan ema ne’ebe la vale iha mundu,” hateten Diretor Fundasaun Ahisaun, Mario Cardoso, (15/06), iha nia knar fatin Aimutin, Dili.
Diretor ne’e dehan, tuir esperiensia ne’ebe sira hetan katak, ema ho kondisaun defisiente iha intelektual ne’ebe kapas tebes, e husi sira ne’ebe tuir ona formasaun iha FA, nain lima mak hetan ona servisu.
“Balun servisu iha instituisaun governu nian no balun loke fundasaun iha distritu hodi halibur maluk defisiente sira, atu sira mos bele iha kbi’it rasik hanesan ho ema normal sira,” dehan Diretor ne’e.
Tuir nia, alende iha Dili sira mos loke ona iha Distritu, hanesan Distritu Ainaro, Maliana, Ermera no Distritu Same atu bele enkoraja no fo kapasitasaun mos ba defisiente sira ne’ebe iha distritu.
Enkuantu total defisiente ne’ebe hela iha Fundasaun Ahisaun hamutuk na’in 33, na’in 13 estudu iha universidade sira iha Dili laran no na’in 11 estudu iha eskola Pre-sekundaria inklui na’in rua iha eskola Ensino Primaria.
Iha fatin hanesan Defisiente Angelino Benevides hateten, ho konesementu ne’ebe sira hetan iha FA, bele ajuda sira hodi dezenvolve an diak liu tan iha sira nia moris.
“Husu ba inan-aman sira labele husik sira nia oan defisiente iha uma deit, fo tempu ba sira atu aprende buat ruma maske ho kondisaun defisiente, sira iha kapasidade ne’ebe bo’ot atu atinji buat ne’ebe sira mehi,” dehan Defisiente Benevides dehan.
